【多囊卵巢症 唔代表不育 只要身心配合要懷孕So Easy】

康妮媽擁有兩個小寶貝 - 哥哥Aidan同妹妹Angie。唔講大家唔知其實當年我努力左足足四年才成功生左哥哥，期間曾經流產3次! 點解? 因為我曾經患多囊卵巢綜合症(以下簡稱多囊)。婚後極速懷孕？意外懷孕？呢D對於當時既康妮媽實在太遙遠，我深深明白世事唔係你話要什麼就有什麼，尤其是孩子。所以，我好感恩係我同黃生既努力同上天既眷顧下，兩個小天使還是來到了我地家中。

多囊(poly cystic ovary syndrome: PCOS)，是一種生殖功能障礙與糖代谢異常並存的内分泌紊亂综合症，也是生育期婦女月經紊亂的最常見原因。患者經超聲波掃描後，會發現卵巢滿佈微小的囊腫，排列如珍珠項鏈狀的不成熟卵泡達10個或以上。形象化D咁講即係正常女性每個週期會排一粒又靚又成熟既卵子，而患多囊女性就會將力量分散左，嘗試同時生產好多粒卵子，結果因為力量唔夠集中導致無粒卵子靚。最麻煩係卵泡未能及時被身體吸收，搵到累積係卵巢度，影響埋下次排卵，導致卵子質素每况愈下。

而我流產既原因就係我既質素唔好既卵子遇上了精子，形成一粒唔健康既授精卵，所以佢會自己慢慢萎縮，自然排出。不幸之中既大幸係我三次都係自然流產，無需手術同食藥。過程除左出血，仲有陣痛，感覺好似經痛咁。當然最難受係心痛﹑徬徨同失望!不過，幾心痛﹑幾徬徨﹑幾失望都過去啦!因為我真係太想擁有自己既小朋友，加上唔肯認輸既性格，努力嘗試唔同方法，當然好感謝上天賜俾我地既緣份，我分別係2014同2016年誕下我既兩個寶貝Aidan同Angie!!!媽咪真係好感恩同好愛你地!

成功心得係乜﹖嗱!唔好CHER我，千真萬確，真係首先要放鬆心情!!!其實食中藥﹑針灸﹑IUI﹑食排卵藥、用排卵棒、量度體溫等好多方法我都試過，我相信唔同方法一定有唔同好處，適合唔同人，但就真係要以平常心去面對，反而會事半功倍!我知道講就易做就難，但試問心情緊張，搵到荷爾蒙失衡，身體點會好呢﹖記得我都曾經因爲想懷孕心情非常緊張，非常無奈。尤其每個月都要經歷希望同失望，心情好似坐過山車咁⋯⋯不但自己難受，令到身邊既人又擔憂，可惜從未成功。最後，係無得選擇中我選擇了隨緣，反而成功懷孕和生產。所以，維持輕鬆心情係必須既，好多謝當時身邊有好多好朋友同好同事聽我傾訴，幫我排解壓力!

接下來同大家分享我個人既成功方法，時間用左幾年，方法用左好多，但我自己感覺當時幫到我既係中藥同針灸！其實中醫我都睇過好多個，一次成千蚊，平均一劑藥成三百幾既都睇過，但效果一般。好感恩後來遇到一位好好既女中醫師。佢開既藥好平和，唔會有好多大補藥，所以價錢唔會太貴，而且藥力溫和，味道唔會太難接受。重要既係，我經過一段時間調理後，有以下改善﹕

健脾﹕腸胃好左好多，無咁容易胃痛，因為中藥改善了我既脾虛，脾主腸胃。

解肝鬱﹕師話我因為生B既問題太抑壓，形成肝鬱。調理後我感覺成個人都舒服左，心情放鬆左，睡眠質素亦有提高。

補腎﹕腎主生育，補腎當然都係重點。我經調理後腰背酸痛大大減輕。估唔到原來我一直腰痛係源於婦科問題，呢個問題既改善都一個意外收穫。

此外，我當年每個星期會去做一次針灸，主要係補腎同幫助排卵。

我覺得多囊卵係一種屬性體質性既病，所以我個人選擇用中藥同針灸去調理好體質，令身體自然生產出成熟既卵子。而且陀b本來就需要有強健既體魄，我想俾一個好既環境俾bb! 不過提提大家，中藥調理係固本培源，需要好有耐性同恒心。我當時都睇左三個月先開始有明顯效果，一年先成功懷孕。

希望患有多囊而又想懷孕既朋友，千奇唔好泄氣！最緊要保持平常心！小天使好快會去到你地身邊！加油！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : 康妮媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！