【英移日誌】極致慳錢大法

By 安妮媽媽親子日記 on 16 Jun 2023

兩女之母，從事親子教育編輯十多年，現與女兒移英，活出第二個人生。

英國國家統計局的數據顯示，英國的通脹率由2022年10月上升至11.1%後，近半年一直維持在10%左右。雖然2023年4月回落至8.7%；最低工資都升咗9.7%，有成10.42鎊（約$103港元）一個鐘，但經歷過通脹，尤其能源費漲得驚人，形成即使有錢，都感覺好應該慳住使，因為真係唔知全球經濟幾時變差。講開慳能源，英國人真係有很多唔同的方法，收集了一些跟大家分享。

Photo from 安妮媽媽親子日記

屋企點蠟燭

先講慳能源，即電和煤。現在夏天到，日照時間長，很多時大家都到天完全黑晒才開燈。即使開都盡量開地燈、枱燈，並用慳電膽。除非必要，否則好少見有屋企係燈火通明的。

我更聽過送外賣的朋友話，有次有客人打來餐廳叫外賣，他負責送去。點知去到天黑晒，但間屋都黑漆漆。朋友心想：做乜叫了外賣走去瞓覺？！於是按門鐘，打算叫醒個客。點知門很快被打開，原來呢家人無開燈，只點蠟蠋，真係估佢唔到。

Photo from 安妮媽媽親子日記

一周洗兩、三次衫

至於慳水，方法仲多。英國夏天都好乾，冬天更加唔使講，一滴汗都唔會有，所以呢度啲人好多時啲衫因為無汗味，都重覆着。相對香港人平常一日洗一次衫，英國人一星期都只係洗兩、三次。有香港人來到說要天天洗衫，有老華僑覺得係匪夷所思。

即使真係洗衫，一機滿的衫都只洗半小時，水溫為攝氏30度。這是根據我區的水務公司教居民洗衫的方法，話可以慳水慳電。

Photo from 安妮媽媽親子日記

一日洗一次碗

洗衫要慳水，洗碗更加要。大女話之前做實習，公司pantry鋅盤長期會有一盤洗潔精水，同事們一回公司，一人飲完一杯咖啡後，就把杯放到洗潔精水內浸住，到放工時就會有最後走的同事，或肯捱義氣的同事，把杯一次過洗乾淨。期間若有人要再用杯，因為杯已浸在洗潔精水一段時間，用水沖下就可重用。唔使人人各自洗杯，用少好多洗潔精和水。

亦見過有公司提供洗碗碟機。員工由早上開始用杯飲咖啡到吃完午餐，把所有用過的杯和餐具一次過洗，不用經常開水喉，慳番啲水。

有家庭即一人有兩、三套碗筷。一餐用一套，到晚上一次過洗。亦有家庭，一人用一套餐具碗碟。若然不是太污糟，可能早餐只是吃麵包，餐具就不用洗，一直用到晚上。除非好污糟才另外開新的，但全部餐具都留到晚上一次過洗。又係慳水的方法。洗時都會有一盤裝洗潔精的水，專用嚟洗餐具碗碟，絕不會水喉長開，浪費食水。

Photo from 安妮媽媽親子日記

做義工分發食物

英國的食物雖然加了不少價，但相對於香港仍算便宜。好像豬扒，香港去街市買可能兩塊要二十幾蚊，呢度我買過8鎊16塊，食最少三、四餐。據聞，呢度啲人會去超市等特價貨出來即買。

學針灸時，有同學有天帶了很多牛角包、沙律和小食來請大家吃。好奇做乜使咁多錢，原來全是免費。英國有個手機App，只要登記成為義工，每天逢有超市送出快過期食物，就可以去拎。但前題係拎了以後，要幫忙拍照放到App上，看看有沒有人要，再分發出去。當然你可以把太多的留些給自己，但前題是要作為中間人幫忙分發出去。所以同學每日都可以攞到很多食物，曾攞過一大袋麵包回家，分了一個晚上，才全部分晒出去畀有需要人士。別好以為是件易事。要去超市攞，又要拍照，又要放上App，又要做聯絡等等，很多瑣碎事要搞。