【教養貼士】太多玩具會影響專注力並引致焦慮！小朋友應該擁有幾多玩具？
太多玩具會影響專注力，引致焦慮？有家長非常疑惑地問我：「心理學媽，唔係下嘛，你嚇鬼呀，玩具咋喎，唔係愈多愈開心咩？」當然唔係啦！你有沒有試過去一間餐廳，想食個簡單午餐，結果成叠餐牌又套餐又期間限定，你睇哂都揀唔到，選擇困難症發作？（注意：世界上並無選擇困難症這個病，但某些病會有這個徵狀，例如抑鬱症患者集中能力不足，會變得難下決定）。
Photo from MamiDaily
現代家長的資源比上一代好，尤其是雙職家庭。父母無時間陪伴，唯有用物質彌補對子女的愧疚。但小朋友係咪需要咁多玩具呢？嗱，我又要幫大家慳錢喇！小朋友，尤其於6歲前，専注力發展未成熟，很容易受環境影響，開住電視做功課是沒可能的事。就算他扮做，個心都飛左去個電視到（所以要做功課就關電視喇！）
Photo from MamiDaily
你給他10樣玩具，他並不會每一樣都専心玩完再玩下一件，而是會每件玩一陣就轉另一件，又再翻兜去第一件，咁有什麼問題呢？
1/ 他只會學識點樣操作果件玩具（㩒邊個制會有聲、邊個制會有燈），但無心神去諗同一件玩具可以有100種玩法。
2/ 學識操作件玩具，係被動的玩法，因為這是依照玩具本身的設計。而超越件玩具本來的玩法，自創新招才是主動的玩法，譬如用叠叠樂的杯來當水杯、花盆。
3/ 主動去玩、超越界定的玩法，是培養小朋友創意（creativity)、自信 (self-esteem)、自主(sense of mastery) 的基礎。
Photo from MamiDaily
所以結論是，給予小朋友少一點玩具，讓他可以激發創意、培養自主及自信！咁幾多為之剛好？
1/ 小朋友睇到又拿到的玩具數量，足夠他幾日內可以玩完的。
2/ 同一款不過三：即可以有車，但只有三架車，可以有公仔，但只有三個公仔。
3/ 已經有太多又想加新玩具，就可以收起已經不再玩的玩具（例如：一歲之後已經不再經常看布書，家長應收起才添新書）。
這個做法確實好難，難道不容許親戚朋友好心買過來？這樣就要考你的智慧及堅定，小朋友未識邏輯思維，你跟他講道理未必明。如果你選擇好好控制及善用玩具、零食去引導孩子的好行為，就要落些功夫！即是說，如果他無情情收到一大堆玩具、未食哂正餐又可以食一大堆零食，所謂物以罕為貴，你又怎樣用玩具和零食去引導小朋友呢？所以我屋企玩具最多的地方並不是廳，而是小朋友不會去、放雜物的地方。到適當時候，我就會放新玩具出來，無玩到半個月都唔會加新玩具。
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
