【湯水食譜】增強小朋友抵抗力！健脾潤肺 蘋果紅蘿蔔蓮子黃豆素湯

依排乍暖還寒，真係一個唔小心又好易病。我哋要增強抵抗力，除咗要補肺氣之外，最重要都係健脾。因為一旦脾胃失調，防禦疾病能力就會下降，咁就會好易起感冒啦！

上網見有朋友仔介紹依個蘋果紅蘿蔔蓮子黃豆湯，除咗可以養好脾增加抵抗力外，仲可以睡得好啲，最好就係簡單方便，前後功夫加埋都係一個半鐘唔洗，咁就當然即刻買齊材料煲靚湯~

蘋果具有生津止渴、潤肺除煩、健脾益胃及養心益氣；紅蘿蔔有治療夜盲症、保護呼吸道和促進兒童生長；蓮子有助於氣血循環，亦有養心安神、健脾補腎；黃豆有益氣養血、健脾健身寧心；無花果潤肺止咳，清熱潤腸。(網上資料)

蘋果2個、紅蘿蔔2條、蓮子兩両、黃豆一両、無花果3粒~

蓮子、黃豆及無花果浸洗一陣~

蘋果刮去果蠟後去芯切開~

紅蘿蔔去皮切塊~

煲內放約2L水，然後隨水加入所有材料~

待滾起時，用大火加蓋煲約15分鐘~

之後轉慢火加蓋煲1小時~

最後加入少少鹽調味(真係加少少就好啦)，就可以飲啦~

啖湯清清甜甜都真係唔錯，有好香嘅紅蘿蔔味之餘又帶少少蘋果香，其實有少少似飲涼茶多過依湯....哈哈哈！

不過無論係湯水定係涼茶，都係為左幫兩位老細打好底，佢地健健康康就係我最大嘅成就。

溫馨提示：
由於個別人仕體質不同，所以大家記得煲之前了解下自己，如有疑問，請先向註冊中醫查詢！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！