【湯水食譜】清甜易入口 小朋友唔抗拒！止咳平喘 改善食慾 蘋果雪梨靈芝茶

屋企大掃除時搵到仲有一小包靈芝片(放心，仲未過期的，哈哈)，為免浪費都係時候煲埋佢。不過上次煲靈芝羅漢果茶時，小小豬雖然都肯飲，不過佢始終對烏卒卒嘅顏色有點抗拒。為免佢俾啲顏色嚇親，所以就請教相熟朋友，最後佢就教我加埋蘋果同雪梨一齊煲！

靈芝屬性平，有助養心安神、補益氣血、止咳平喘、改善食慾不振及消化不良。雖然用途好廣亦都係好有益，不過就味道帶點甘苦，所以直接焗茶煲水飲就比較難入口。今次加左雪梨、蘋果同無花果之後，既清甜潤喉，而且佢地嘅甜味能平衡靈芝嘅甘苦味，最重要係唔再烏卒卒，大人小朋都友都啱飲啦！

材料有：靈芝片約10g、雪梨4個、蘋果4 個、無花果5 粒、南北杏兩湯匙及雪梨乾幾片~

靈芝片、南北杏及雪梨乾浸洗一陣；蘋果及雪梨去芯切塊洗淨~

煲內放4L水，然後加入所有材料~

待煲滾後，用大火加蓋煲約15分鐘~

再轉小火加蓋煲多1小時~

熄火後要即刻夾起啲材料(尤其係啲靈芝片)，否則浸得太耐，茶的苦澀味就會重~

最後隔渣就可以飲得啦~

味道又係點呢？其實入口又真係飲唔出嗰一陣靈芝味，反而就似係飲緊蘋果雪梨水，甜甜地好易入口，最重要當然係小小豬完全零抗拒，所以下次再煲靈芝茶就可以用依個方法！

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！