【BB成長日記】疫症下的QE新生嬰兒黃疸 | 私家醫院跟進服務公院收費

妹妹出世後第二日，喺醫院病房抽血，驗到新生嬰兒黃疸指數偏高。醫院就唔俾妹妹同我出院，雖然醫院話黃疸指數偏高，但又話未需要去到照燈。於是就叫我哋留醫多一晚，觀察一下。明早再驗一次血，再睇妹妹嘅情況。

好啦，因為咁無需要照燈之下，兩母女又一齊住多咗一晚。

第二日，妹妹又再喺腳板底抽血驗。等數小時見埋醫生，醫生話妹妹可以出院，超級開心呀！即刻執行李走。而姑娘都有吩咐，出院後要即刻預約健康院服務。

Photo from 和牛B的成長日記

我哋好快就約到個期，結果去到健康院檢查新生嬰兒黃疸。健康院係用機驗，非抽血。所以健康院即時話妹妹個指數好高，仲即刻寫封轉介信俾我哋，要我哋儘快返去檢查同照燈。

去到QE，辦理所有手續。妹妹要擺低喺醫院，又抽血驗。然後等3-4小時先知驗血報告，睇下係咪需要留院照燈。結果4小時後，醫院話妹妹黃疸指數未去到需要照燈，可以出院。

延伸閱讀：
【2020生產記】疫症下去公立醫院生BB不可以陪產？沒有探病時間？

不過，姑娘帶咗新嘅訊息同選擇俾我。佢話因為疫症關係，醫院都考慮到父母會擔心帶住BB出入公立醫院會有風險。所以特意為「新生嬰兒黃疸」安排一個名為「新生嬰兒黃疸治療協作計劃」，就係私家醫院轉介服務，價錢同去公院一樣平，但就去私家醫院檢查。

而QE提供嘅係轉介服務，係可以以公院價錢去到聖徳肋撒醫院到做檢查。考慮到安全，同地點。我哋都覺得去私家都好方便，所以都叫QE幫忙預約留位。第二日就過去覆診檢查。

唔去私家醫院都唔知，原來而家私院係唔收發燒及有新冠肺炎病徵嘅病人。所以相對有確診人士嘅機會低好多，亦安全好多。

登記後，馬上可以去抽血驗。輪候、抽血時間不出5分鐘，再到診症室等見醫生。

延伸閱讀：
【胎毒】清胎毒有何作用？BB皮膚會更好？附4款清胎毒食譜

醫生話妹妹個新生嬰兒黃疸指數偏高，要馬上安排留院照燈，至少2日。我哋有問醫生，點解會健康院話高、QE話未需要照。醫生話因為健康院同每間醫院定嘅指數界線都唔同。例如醫院要去到300度或以上先可以照，但係如果指數去到380度，係會傷到個腦。

最後，妹妹用15分鐘時間內就已經被安排上到病房，沖好涼就即刻照燈。

Photo from 和牛B的成長日記

全程加埋都係大概1小時，相比公院真心慳咗好多時間！所以，政府真係好需要出招舒緩公院嘅資源同壓力。人手不足，又要應付疫症病人，真係好吃力。

講咗咁耐，等我分享返今次QE轉介去聖徳肋撒醫院嘅收費先。

費用:
每次診症費$80
入院費用$75，以及每日住院費用為$60

Photo from 和牛B的成長日記

所以，如果其他公院都有提供私院轉介服務，跟進新生嬰兒黃疸。唔需要擔心，私院無BB嘅出生資料、病歷狀況。因為公院同私院已開通醫健通服務，申請咗醫健通。公院、私院只要撳個掣就會有晒所有資料，真心方便。今次，真係慳到時間又安心。如果無轉介服務，我都唔知要再來回QE折騰多幾多日了。

Photo from 和牛B的成長日記

關於新生嬰兒黃疸
Photo from 和牛B的成長日記

【舊文重溫】
BB成長日記- 衝急症室- 新生嬰兒黃疽

#公院價錢私院服務爽
#增加公院資源開支
#感謝醫護
#新生嬰兒黃疸
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：和牛B的成長日記

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！