【湯水食譜】熬夜必飲！簡單易煲 清熱解毒 金銀花菊花杞子茶

上次我煲紅豆水時，我都有俾小半杯小小豬飲。不過依隻衰豬飲完次後就即刻話『MaMi....我都係鐘意飲菊花茶多啲』，既然佢鐘意，我當然好樂意煲俾佢飲啦，所以今次就煲左金銀花菊花杞子茶啦~

菊花茶我都成日煲，不過今次加埋金銀花同埋杞子一齊煲，三者都係一啲性質溫和嘅藥材，對清熱解毒同埋眼晴明目都好有幫助。除左啱小朋友飲之外，對一啲眼部浮腫同埋夜瞓人士(即係我啦)都好啱飲呀！

材料都只係需要四樣：金銀花(由於佢嘅味道有點甘味，所以唔可以落太多，如果唔係就會帶點味，所以我只係落左約兩湯匙)、菊花約十蚊、杞子約一湯匙及少少冰糖~

將所有材料浸洗約半個鐘20分鐘，然後隔水備用(記得要分開嚟浸洗，因為佢地落嘅次序唔同呀)~

煲內放2L水，待滾水後加入金銀花及菊花，用中火煲20分鐘~

之後加入杞子及冰糖再煲15分鐘(冰糖嘅份量可因應個人喜愛甜度，不過如果想更加有效達至清熱作用，就不建議加冰糖作調味，以免影響佢地嘅功效。不過如果俾小朋友飲的話，都係落少少等佢地甜甜地飲得開心啲)~

最後熄火焗10分鐘，然後隔榨就可以飲得啦~

有佢鐘意菊花茶飲，小小豬緊係飲得開心，話咁快就飲晒依一大杯啦~

温馨提示：雖然依個金銀花菊花杞子茶簡單易煲又幾好飲，不過蠶豆症嘅朋友仔係唔可以飲用金銀花，所以煲嘅時候要留意呀！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！