【湯水食譜】大人小朋友都啱飲!潤喉化痰 龍利葉雪梨乾桔餅茶

【湯水食譜】大人小朋友都啱飲!潤喉化痰 龍利葉雪梨乾桔餅茶

爸媽分享
By小小豬Kinsey on 28 Feb 2020

依排老公都有幾聲咳,再加上話個喉嚨開始有丁點痛,見早前有朋友仔介紹龍利葉雪梨乾桔餅茶,可以有潤喉、化痰火及潤肺舒燥作用,所以我又買齊啲材料做個賢妻啦~

IMG_2501

基本上今次大多數都係用乾物,由於雪梨乾及龍利葉乾係經過處理,所以少左一份寒涼,再配合埋羅漢果一齊,咁就唔會太過寒,大人小朋友都可以飲得啦!

所有材料係藥材鋪都可以買到,我依度就係大約三人份量,如果多人飲用的話,可以請店員幫忙加添呀!

雪梨乾三両、龍利葉乾一両、羅漢果一個、桔餅兩個及南北杏一湯匙~

IMG_2419

龍利葉乾及雪梨乾先浸洗一陣~

IMG_2427

羅漢果壓碎,桔餅切碎~

IMG_2422

廣告
廣告

在煲中注入約4L水,大火煲滾水後將所有材料加入。待水再滾起時,轉用慢火煲1.5小時~

IMG_2431

如果有需要時,可以加少少片糖用作調味,不過我自己就冇加,因為覺得都好夠甜啦!

隔楂後就可以飲啦~

IMG_2504

入口就有甘甘甜甜味道,比起純羅漢果荼,老公明顯係受落啲,仲贊都唔錯添。飲落個喉嚨又帶少少涼嘅感覺,飲完喉嚨又真係舒服左啲哦!

其實小朋友都可以飲用,不過小小豬一見到個黑卒卒嘅顏色就已經SAY NO,非常好不情願之下先肯飲一小杯呀!

溫馨提示:藥材依方面都係好因應個人體質,所以記得煲之前了解下自己,或者問下相熟藥材店職員,依個藥方啱唔啱自己飲呀!

Text & Photos:小小豬Kinsey

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

🤱🏻 追蹤我們的 Instagram mamidaily.hk 看更多育兒教育資訊
Share to Facebook