【湯水食譜】大人小朋友都啱飲！潤喉化痰 龍利葉雪梨乾桔餅茶

依排老公都有幾聲咳，再加上話個喉嚨開始有丁點痛，見早前有朋友仔介紹龍利葉雪梨乾桔餅茶，可以有潤喉、化痰火及潤肺舒燥作用，所以我又買齊啲材料做個賢妻啦~

基本上今次大多數都係用乾物，由於雪梨乾及龍利葉乾係經過處理，所以少左一份寒涼，再配合埋羅漢果一齊，咁就唔會太過寒，大人小朋友都可以飲得啦！

所有材料係藥材鋪都可以買到，我依度就係大約三人份量，如果多人飲用的話，可以請店員幫忙加添呀！

雪梨乾三両、龍利葉乾一両、羅漢果一個、桔餅兩個及南北杏一湯匙~

龍利葉乾及雪梨乾先浸洗一陣~

羅漢果壓碎，桔餅切碎~

在煲中注入約4L水，大火煲滾水後將所有材料加入。待水再滾起時，轉用慢火煲1.5小時~

如果有需要時，可以加少少片糖用作調味，不過我自己就冇加，因為覺得都好夠甜啦！

隔楂後就可以飲啦~

入口就有甘甘甜甜味道，比起純羅漢果荼，老公明顯係受落啲，仲贊都唔錯添。飲落個喉嚨又帶少少涼嘅感覺，飲完喉嚨又真係舒服左啲哦！

其實小朋友都可以飲用，不過小小豬一見到個黑卒卒嘅顏色就已經SAY NO，非常好不情願之下先肯飲一小杯呀！

溫馨提示：藥材依方面都係好因應個人體質，所以記得煲之前了解下自己，或者問下相熟藥材店職員，依個藥方啱唔啱自己飲呀！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！