【湯水食譜】簡單易煲！消滯潤肺 羅漢果山楂紅棗茶

今個新年真係好口福，基本上由年三十晚就食到年初五，日日都糕糕糕加大魚大肉，所以都真係有少少飽飽滯滯，所以趁今日有時間就煲番個羅漢果山渣紅棗茶，紓緩下個胃，消消滯之後就再食過。

哈哈哈….食得是福嘛~

羅漢果則潤肺生津；山渣消積化滯、活血化瘀，但孕婦、胃潰瘍及胃酸過多人士則不宜服用；桂圓及紅棗均補心脾、益氣安神。(網上資料)

羅漢果1個、山楂10g、桂圓約10粒、紅棗約10粒~

羅漢果捽碎~

紅棗洗乾淨後去核~

然後將所有材料浸洗一陣~

煲內放大約2.5L水，然後加入所有材料~

先用大火煲滾~

之後轉用慢火加蓋煲30分鐘~

熄火後就要即刻夾起啲材料，因為羅漢果同山渣浸得耐，個茶就會變得又酸又苦呀~

味道就酸酸甜甜好易入口，就連小小豬平日唔多鍾意飲烏卒卒涼茶，佢今次都乖乖要添飲呀~

其實我之前都分別煲過羅漢果同山渣茶，佢哋兩個嘅味都真係好唔同，一個酸酸地，另一個有少少回甘味，所以初時都有丁點擔心依個涼茶會唔會好古怪，不過估佢唔到個味道又幾夾，飲完又真係覺得個胃頂頂感覺好似輕微咗，我估都應覺幫我消滯呀！

溫馨提示：
由於羅漢果屬性都偏涼，所以係好因應個人體質，大家記得煲之前了解下自己，或者問下相熟中醫/藥材店職員，呢個啱唔啱自己飲呀！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！