【新年食譜】超簡易賀年糕點 自家製好意頭 元寶桂花糕

由於新年將至，上星期行上海街時見好多新年糕點嘅工具材料賣，攪到我又心思思想整埋一份，最後我就買齊材料同小小豬一齊整依個簡單元寶桂花糕嚟應下節啦~

其實我原來係想買材料整椰汁年糕同馬蹄糕，不過又冇信心可以整得好食。正當我15/16時，聽到有同場其他顧客講緊整桂花糕，聽佢地話又好似幾易整，所以就上前請教個食譜，買齊材料試下啦~

首先預備20G魚膠粉~

然係用熱水坐熱，慢慢攪到變成魚膠液~

延伸閱讀：營養師4大貼士 教小朋友新年如何吃得健康

延伸閱讀：自製健康BB版杯仔蘿蔔糕

冰糖就大約90G，其實份量就可以因應個人口味加減~

將350ML嘅水同冰糖放入煲內煮滾~

待冰糖完全溶解後熄火，再將魚膠液及3/4茶匙嘅桂花糖加入，然後慢慢攪勻~

攪拌好後就可以倒入模具內~

放入雪櫃雪至凝固後，甩模就大致完成啦。由於元寶係硬模所以都有啲難度，所以可以係個底沖一沖熱水，咁就易甩好多啦(但好明顯我都有少少失敗，角位有少少甩，不過...第一次整，當睇唔到啦)~

黃金色嘅元寶其實都幾靚，新年時食應該都幾有氣氛呀...哈哈哈~

味道方面我就覺得好香桂花味，只係可能我地一向唔太"好"甜，所以我覺得90G就甜左少少，下次整可以減少啲啲。

我自己就覺得OK，都幾好食呀。不過老公就話比教硬身，冇坊間買嘅咁軟淋淋。唉...依個老公總係鐘意打擊我(尤其係我整嘅甜品，佢真係好少讚好食，其實.....係佢唔鐘意食甜品咋)，不過有意見我係會接受，亦都係我繼續嘅動力，下次一定要返啲連佢都大讚嘅甜品先得！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！