【湯水分享】清喉潤肺 蘋果無花果蓮子素湯

秋天一到個喉嚨就好容易乾，同時亦都好易有幾聲乾咳，之前都曾經問過中醫師，佢話係秋燥嘅症狀之一，唔需要太擔心，只要多啲飲滋潤湯水就可以。就係咁....我今日就煲咗一個清喉潤肺嘅蘋果無花果蓮子素湯，等我哋三口子齊齊滋潤吓啦~

無花果健脾、滋潤；蘋果就潤肺除煩、健脾益胃、養心益氣；麥冬百合就有助清熱潤肺寧神，養陰護胃；蓮子就清心養神益腎的作用。(網上資料)

無花果4個、蘋果3個、蓮子½兩、百合1兩、麥冬½兩、腰果1兩半~

小心檢查蓮子，因為有部分仍然有中間的黑芯，需要除去那條黑芯先可以煮食，如果唔係整煲湯就會變苦啦~

無花果洗淨切半~

將所有材料浸洗一陣~

原來蘋果(尤其係蛇果)通常會打一層果蠟，打蠟可以保持水果新鮮，且能防範病蟲害。不過依啲果蠟都唔係天然嘢，所以都唔好食落肚，最好就係刮走佢~

蘋果洗淨後去芯切塊~

煲內放約2.5L水，然後隨水加入所有材料~

待滾起時，用大火加蓋煲約15分鐘~

之後轉慢火加蓋煲1.5小時~

最後加入少少鹽調味，就可以飲啦~

啖湯清清哋又帶點甜，而且又有好香蘋果味，所以都唔錯，三口子一人兩大碗，話咁快就飲晒整煲湯啦！

其實我之前都真係唔多飲素湯，因為我地三口子都係食肉獸，總係覺得有肉落肚先叫好。但其實素湯都一樣好飲，只係少咗肉湯嘅一份肉味，而且可以飲得清淡又健康呀！

溫馨提示：
由於個別人仕體質不同，所以大家記得煲之前了解下自己，如有疑問，請先向註冊中醫查詢！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！