【滋補長高】太子參淮山田七瘦肉湯

一啲所謂嘅親戚朋友每次見到小小豬都總係會話「做乜佢咁瘦呀？」「做乜佢咁細粒呀？」「佢依家係咪讀緊一年班？」，真係俾佢地講到我好似刻薄自己個仔咁，雖然我已經成日同自己講「我點湊又關佢哋乜事？總之我自己知我照顧得豬仔好好就得，個仔精靈聰明就夠」。但.......老實講聽到有時都會十級嬲呀！

唔知點解隻豬仔食極都好似唔多吸收，所以我都好努力咁周圍搵下有冇啲食譜可以幫到手。就喺一次去相熟藥材店入貨時，同店主叔叔傾開，佢就教我煲依個太子參淮山田七瘦肉湯，可以滋補强壯同時又有助長高，而且對脾胃功能弱，身材偏矮及偏瘦小朋友很有幫助。

一聽到咁就緊係即刻執返份材料，試下煲俾小小豬飲啦~

田七除可以止血外，尚有通脈行瘀及造血之作用，能促進小朋友發育長高、提高學習和記憶能力的作用；太子參又名孩兒參，它不是參科植物，屬石竹科植物，有人參功效但力稍弱，很適合小朋友用；而配太子參、淮山、紅棗及雞胸肉同用，能健脾補氣血，對小朋友發育長高有一定幫助；淮山健脾開胃，其他好處為治療久泄久痢、肺氣虛燥、及消渴尿頻等症；紅棗均補心脾、益氣安神。(網上資料)

太子參15g、田七15g、淮山37g、紅棗6粒及瘦肉約$30(由於係第一次煲田七，唔知係咩味，所以只係煲約四碗湯份量)~

紅棗洗乾淨後去核~

其他藥材浸洗一陣~

瘦肉洗淨汆水~

煲內放2.5L水，然後隨水加入所有材料~

待水滾後繼續用大火加蓋煲約10分鐘~

之後轉慢火加蓋煲多2小時~

最後加鹽調味，就可以飲得啦~

湯嘅味道對於我同老公嚟講都唔大問題，都係普通藥材湯味咁啦。不過對小小豬嚟講就一定唔係好啱飲，因為田七同太子參煲起都會有淡淡嘅似人參嘅甘味道，小小豬就一向唔多鐘意依個味，所以我都要半?半威迫利誘之下先飲左兩碗(到第二碗時佢習慣左個味就飲得快好多啦)。

可能小小豬都想快高長大，當佢知道個湯嘅功效之後，就叫我再煲多啲俾佢飲，仲攪笑話唔會再怕嗰一陣甘味。

哈哈...其實佢唔講我都會再煲多幾次，飲多啲就可以快啲增高增磅嘛！

溫馨提示：
- 孕婦及感冒患者不宜飲用！
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！