【補腦兼明目】日月魚節瓜淮山合桃湯

又嚟大手入咗好多煲湯材料，梗係啦....我要煲多啲靚湯俾兩位老細飲，尤其要努力養肥瘦猛猛嘅小小豬先得嘛！

係買咗咁多材料都唔知煲咩好嘅時候，店主叔叔就教我先嚟煲日月魚，仲教我加埋節瓜、淮山、合桃一齊煲湯，啖湯超甜又正氣，最重要係可以補腦兼明目，啱晒剛剛開學嘅小小豬呀~

日月魚可有醫治眼疾、明目、補腎益肝、養顏美髮功用，含有豐富蛋白質、磷、鐵、碘及鈣質，所以對調節人體代謝平衡及促進生長都有一定幫助；節瓜具有清熱、清暑、解毒、利尿及消腫等功效；淮山健脾開胃，其他好處為治療久泄久痢、肺氣虛燥、及消渴尿頻等症；蓮子有助於氣血循環，亦有養心安神、健脾補腎；茨實有補脾化濕、益腎固精功效；扁豆可以健脾和中，消暑化濕；合桃有補腎補腦、健胃補血、潤肺養神功效；腰果能夠健脾補腎及止久渴；椰棗有豐富鎂鐵，食物纖維同埋胡蘿蔔素。另外佢嘅糖分係單純糖，所以就更加容易消化吸收，可以減輕腸胃負擔。(網上資料)

日月魚一両、節瓜兩條、淮山一両、蓮子一両、茨實一両、扁豆一両、椰棗四粒、合桃半飯碗、腰果約半飯碗~

日月魚洗淨後浸至軟身~

其他材料浸洗一陣~

節瓜刮去外皮後切件~

煲內放約3L水，待滾後加入所有材料~

然後繼續用大火加蓋煲約15分鐘~

再轉慢火加蓋煲多1.5小時~

最後加少少鹽調味就飲得~

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！
- 雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！