【觸得到的 ♥ 寶寶回憶禮物】

由準媽媽到成為新手媽媽，相信各位一定百感交雜～

懷胎十月、入院待產、坐月、餵人奶之路⋯⋯雖然有苦自己知，但當見到BB既一刻，心都融化了，仿佛眼中只有寶寶一人，時時刻刻都想記錄低佢地既成長之路～

米高媽媽身為二寶媽，為左保留小寶貝既童年回憶，四出搜羅各類BB回憶禮物，甚至毅然創業，希望可以同大家分享一下心水之選：

No.1 BabyICON   3D／4D超聲波及寶寶心跳錄音機

創辦理念：集合歐美最時尚的胎兒超聲波寫真概念及融和多年產科超聲波的經驗，以全新的概念「胎兒為本 (baby-centered)」及「準爸媽為本 (client-centered)」，讓準爸媽在過程中作主導，配合超聲波專家的經驗，讓胎兒自然地展示最美最動人的一刻，讓我們拍下最珍貴的成長照片和錄像，以CD及DVD存留永遠的禮物。

應該大部分既準爸爸媽媽都會好想知道BB既性別，個樣似自己定另一半多D⋯⋯所以一般既超聲波實在滿足唔到，得知坊間有4D超聲波公司就即刻預約見BB！

BabyICON建議最好胎兒於34-36週約見，因為BB個樣更成形。整個服務過程約半小時，包括評估BB性別及聽聽胎兒心跳聲同肚中既BB拍寫真（約40-80張存於DVD以及打印3張靚相）

哩個就係Sleepy包包，個樣真係勁似爸爸！

至於哩個就係細佬B，眼線相對較長、面面較多肉。

胎兒心跳聲仲會幫忙記錄落一部心型BB Heart-Beat Recorder，到bb長大後再聽番真係好有感覺。

No.2 HONG KONG HAND 嬰兒手腳倒模

創辦理念：迎接新生命來臨過程充滿好奇和興奮、畢生難忘。孩子從襁褓、牙牙學語至懂行懂走、瞬間長大的速度，當察覺時已經捕捉不住，為嬰兒製作手腳倒模，可留住孩子的成長一刻印記，奇妙的回憶永恆留存。

Hong Kong Hand已經有19年為bb整手模腳模既經驗，所以一定係不二之選。店主相當貼心，事前可watsapp預約，然後會提供最專業既建議，約好時間就會親自上門為BB做專屬手模腳模。

＊建議先為BB影完一輯靚寫真，再訂造手模

包包的手模腳模選用銀色，右邊框內銀色貼片會刻上BB姓名、出生日期及製作日期

而細佬B就選擇金色，見到BB既手仔腳仔真係好治癒呀！

過程約半小時，店主相當細心、對小朋友無微不致，家長大可放心。

BB整完就到家長選擇相框顏色、背景卡紙顏色及裝飾邊，然後就可以等收貨。

另有PACKAGE係定時上門製作，咁就可以記錄低BB隨住時間既成長，手腳漸漸變大既奇妙過程。

此為另類選擇，一家人手牽手心連心。

NO.3 愛思胎毛筆

創辦理念：他們為小孩服務直至十八歲成人禮，專門經營祖傳胎毛筆、胎毛臍帶印章、胎毛扇，是香港唯一胎毛筆、胎毛臍帶印章、胎毛扇專業從業者，其作品不下3,000,000支胎毛筆及書法筆。

想整胎毛筆主要係因為爸爸見到愛女BB時期頭髮較稀少⋯⋯傳統有個說法就係剃過頭毛，長大後頭髮會更濃密。

雖然媽媽非常唔捨得囡囡變光頭豬，但都尊重爸爸意願。既然要剃，不如再善用頭毛製作成胎毛筆，以此留念。

佢地相當專業，會先為bb配戴玉器定驚。包包剃頭過程都冇大叫大喊，乖乖坐定定，唔駛一分鐘就變身成為光頭豬lu～

大概25-60個工作天，胎毛筆就可以製作完成。

相信各位媽媽都有疑問係咪真係頭髮急急長，下圖就係包包10個月左右既幾條頭毛。

其實剪完髮約3-4星期就開始生番較濃密既毛髮，右邊就係包包3歲幾時既頭髮實況。

愛思胎毛筆特設門店

地址: 旺角亞皆老街109號皆旺商業大廈26樓07室   電話 23364590

NO.4 KIDSMADE   孩子畫作純銀飾物

創辦理念：YOU DRAW IT WE MAKE IT，讓你既孩子成為你既專屬設計師。將小朋友獨一無二既畫作變成恆久回憶、隨身攜帶，將你既心愛首飾變成流動畫展。

Kidsmade 致力為每一位客人製作每一件純銀飾物，盡力保存每一件佳作。

話說店主Kibbee係百貨公司買手，經常要到歐洲出差，一去就半個月，果種難離難捨既心情做左媽媽一定明！

於是Kibbee就想到將仔仔畫作製成頸鍊   可以出trip都整天戴上身。

KIDSMADE產品多元化，不論手鐲、戒指、匙扣、手鏈頸鏈、耳環⋯⋯

只要你所想，店主都會一一為你實現～

哩張就係包包第一次親手畫既一家四口合家福，真係有高矮肥瘦之分～咁可愛！當然要永久保存啦！

身為在職媽媽，工作需要偶爾都要出trip⋯⋯果種依依不捨既心情真係非筆墨可以形容⋯⋯

正如店主既理念，將小朋友獨一無二既畫作變成恆久回憶、隨身攜帶

訂造一條純銀頸鏈，咁就可以去到邊都一家四口子啦～

製作方法相當簡單，只要send張靚靚作品俾佢地，叮一聲店主就可以神還原，唔駛兩星期 就可以訂製成獨一無二既首飾。

而且包裝相當精美，大時大節用黎送禮，收到果刻真係無價。

爸爸們如果諗緊送鑽戒定金銀珠寶俾老婆大人，可以考慮下訂製哩款全球獨一無二既配飾。

NO.5 Smiley Workshop  回憶小熊＋成長紀念被

創辦理念：為了保存珍貴回憶而為客人製作出令人會心微笑、觸得到的回憶禮物。店主一直很想為地球出一分力，修讀Fashion design時已經成日空想一個Upcycle既品牌，不過一直都係發白日夢。直到寶貝女出世，眼見BB日漸長大，家中儲埋一大堆唔啱著既BB衫，不過件件都好有紀念價值，所以就決心成立Smiley workshop 專門用BB衫製作成回憶小熊，致力為家長們保留小寶貝最珍貴的童年回憶。

相信有D 熟客都知（利申:哩位店主就係米高媽媽本人）

哩個創業夢真係可以帶俾各位小朋友同家長無限既歡樂，望見幸福小熊，D回憶即係番晒黎，所以一直堅持每一年都為二寶送上獨一無二的生日小熊。

加上細佬B有濕疹，要同毛公仔講BYEBYE，唯有用佢自己既純綿衣物度身訂造成陪訓專員。

至於包包都好愛佢隻幸福小熊，仲會同佢講故事，而且活動手腳仲可以同佢換衫仔。

而每一位小客人都會連同回憶紀念咭送上，長大後送番俾佢自己細味。

店主會盡力滿足客人要求，希望善用每一件小朋友衣服。每隻小熊大約用上4-5件bb衣物造成，由於100%手作關係，製作時間需要約一個月，慢工出細貨嘛～

除左小朋友既幸福小熊，小店都有為twins大人及Long distance情侶接單訂造。

創業3年多已為Hong Kong babies製作超過300多隻幸福小熊，而每一隻小熊背後都有一個故事，當中有平淡的、幸福的、動人的、傷感的⋯⋯

多謝各位大小客人既信任同支持，因為我地明白每一仔BB衫仔都好珍貴。

我地同時有幸為廣告界既KOL包包同哥哥Karson製作幸福小熊及成長紀念被！

訂造成長紀念被約需要 25-30件小朋友衣物，成品為被袋，可因應季節自行加入被芯。

另有姓名、生日日期及特別句子繡字服務提供，送禮自用都相當有紀念價值。

希望大家鐘意以上【觸得到的 ♥ 寶寶回憶禮物】5大推介，大大力支持以上100%香港原創品牌。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：米高媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！