唔要齋畀零用錢 仔女都要去「搵工」

細細個想要有錢買下嘢，唯有靠爸媽嘅零用錢～爸媽都會自動自覺每月畀下仔女零用錢，依個習慣唔係唔好，因為仔女都可以學下儲錢，唔通人仔細細叫佢返工咩？但美國就有位媽媽就真係叫仔女「返工」賺零用錢！

媽媽Shaketha喺屋企貼出多張招聘，有「廚房經理」、「首席住宅內部服務員」及「衣務部主管」等，申請「人」需要填妥表格，而表格都似模似樣，有齊晒一般聘請問題，就連「薪金期望」同「最早入職日期」都有，絕對係有傾有講！

雖然只係自己仔女應徵，但係見工面試都唔少得，目的就係想小朋友之間可以公平競爭，面試時都要講下自己相關經驗，等仔女盡情sell下自己，當被安排工作時都可以心服口服。

Shaketha對今次嘅招聘絕對落足力，有埋宣傳單張，仲話自己係一間能夠畀「員工」建立自信，同一間互相信任嘅This Mom Means Business Inc.
其實媽媽搞咁多嘢都係唔想仔女做「伸手黨」，想小朋友知道搵錢係要付出，當然依間公司會包埋住食喇～

Text：mamiDialy
Sources：Mirror