懷孕期間做運動 對媽媽同胎兒一樣好！

好多準媽媽都有一個疑問，就係有咗BB可唔可以做運動呢？懷孕初期未穩定又驚小產，到後期個肚大大，行動有啲笨拙又唔係太方便做運動。近日一項研究指出，喺懷孕期間做運動嘅話，可以幫仔女預防肥胖，身體都健康啲啦！

Photo from MamiDaily

一項美國華盛頓州立大學嘅研究，以老鼠進行一項有關孕婦做運動嘅實驗。主導研究博士生Jun Seok Son將實驗老鼠分為每日進行60分鐘中度運動以及冇做過運動兩組，及後將兩者嘅後代作比較。呢個研究更加係第一個報告證明非肥胖孕婦做運動，對後代發育有好處！

結果發現，喺懷孕期間有做運動嘅老鼠同冇運動嘅比較，與啡色脂肪的有關嘅蛋白質水平上升，可以將脂肪同糖轉化成熱量，新陳代謝得比較好。及後，研究人員繼續觀察兩組老鼠嘅後代，喺佢哋斷奶後，餵一啲脂肪較高嘅飲食畀佢哋食。

Photo from MamiDaily

媽媽有運動嘅小老鼠，就算食一啲高脂肪嘅食物，佢哋嘅體重唔單止冇增加反而減輕咗，而佢哋患上糖尿病或脂肪肝等嘅機會亦較低。

首席研究人員Jun Seok Son表示佢哋嘅資料顯示，健康嘅孕婦缺乏運動非常容易令小朋友患上肥胖或一啲代謝疾病。佢哋建議所有孕婦喺懷孕期間要定期做運動，唔止對佢哋自身有益處，更有助提升小朋友嘅新陳代謝！

Photo from MamiDaily

以上研究內容未必人人適用，始終各位準媽媽嘅身體情況都唔同。如果對此有疑問，最好都係搵醫生聽吓專業嘅意見啦！

Text：Mami Editorial