仔仔敗血症4肢血管堵塞 腳部「自行截肢」掉落媽媽手

英國有11個月大男嬰因喉嚨發炎引致敗血症，繼而需要截肢保命。

媽媽Abigail指，開始時仔仔只係普通喉嚨發炎，即使已睇醫生都每況愈下，直至有一日晚上，當推動仔仔時，仔仔無咩反應，而且表情係相當痛苦。當抱起佢時，仔仔不斷呻吟，好似骨痛一樣，最後連喊都變到冇力。

當去到醫院後，仔仔雙腳冰冷而且發紫，醫生診治後，指仔仔情況相當嚴重，並告知仔仔四肢血管堵塞，係敗血症導致身體抗凝血機制進入超速狀態。

「一切發生好模糊，而醫院當時已經好緊急，眼前只有好多急救儀器不斷推入手術室，我完全唔知我仔仔發生咩事，只係眼中見到仔仔雙腳發紫，我只可以做到就係叫護士幫佢著返對襪⋯⋯我咩都做唔到⋯⋯」媽媽Abigail憶述指，當時醫生2次告知，仔仔未必可以渡過依場難過，要Abigail要有定心理準備。

Abigail痛心指，仔仔情況不斷惡化，四肢開始變黑；更嚴重係，當抱起仔仔時，其中一條腿「自行截肢」，好似鬆脫咗一樣，掉落自己手上。「我從未試過咁驚，甚至驚咗自己嘅生活，當時醫生發現時，問我使唔使離開一陣，我當刻好堅定同醫生講，唔需要，我要陪伴我仔仔，我唔會留佢自己一個喺度。」

其後醫生解釋指，由於仔仔現時係敗血症導致身體抗凝血機制進入超速狀態，導致四肢血管堵塞，身體組織失去氧氣同其他重要營養物質，導致死亡，要中斷並唔好令其他器官受影響就要將已死嘅移除，即仔仔嘅四肢。醫生同時亦提醒媽媽，當仔仔四肢被截除後，要有相當大嘅勇氣去照顧對方，佢將會同一般小朋友唔同。

但為咗保命，加上時間緊迫，媽媽Abigail必需跟隨醫生建議「身邊有好多人都擔心我，但我知道我仍然有仔仔陪伴，雖然佢已經冇咗四肢，但係佢仍然常笑，係一位勇敢嘅小男孩。」

最後，仔仔喺截肢3個星期後出院，情況穩定，甚至可以用身滾動，試圖翻轉同玩公仔。「佢依家不斷康復中，我為佢感到好驕傲，即使截去4肢，但仔仔已經變得有活力，每日都會對我微笑，一見到佢笑，我覺得一切都唔係問題，我哋仍然幸福，因為大家都有彼此。」

媽媽又再提醒，要時刻留意小朋友嘅食慾同去小便問題，一旦發現唔妥，應該要睇醫生，要喺12小時內觀察狀況。另外，醫生又指，其實今次男嬰嘅病情係不幸中大幸，大多數小朋友即使截肢後，都發現其他器官已感染，最後都不敵病魔。

根據英國研究兒童健康報告指出，一般嬰兒膿毒症症狀係幼兒後腦出現突塊（類似淋巴突起）。而喺英國，每年約44,000人死於敗血症，按照UK Sepsis Trust and NHS Choices指出，膿毒症引致嘅敗血症同流感，腸胃炎或胸部感染症狀相似，包括：

-小便錯亂

-肌肉疼痛或抽搐

-一日內都冇小便

-呼吸困難

-突然變冷

-昏睡

-會有出現褪色嘅皮疹

-反複嘔吐

Text：mamiDaily

Sources：dailymail