係真唔係？做爸爸嘅幸福感竟然高過媽媽

自從生咗BB後，生活真係有好大變化，基本上咩都係以BB為先，個世界簡直圍住佢轉，仔女嘅笑容已經變成自己努力向上嘅動力。近日有研究指出，男士做咗爸爸後，竟然幸福過媽媽！究竟係咩原因造成呢個結果呢？

Photo from MamiDaily

一項由美國加州大學河濱分校心理學學者喺發表《人格與社會心理學學報》嘅「Parenthood is Associated with Greater Well-Being for Fathers than Mothers」研究，分析咗3份獨立、參與者共超過18,000人嘅研究報告。目的係搵出做咗父母後心理狀況嘅變化，佢哋對住BB時，究竟係快樂、幸福、抑鬱、滿足定有壓力。

第一及第二個研究報告係以父母同冇小朋友嘅人作比較，而第三個研究則以父母湊仔日常為主。結果顯示，相對冇小朋友嘅同齡男士，爸爸們對於佢哋嘅生活感覺滿足，正能量亦較多，抑鬱症狀則比較少，反而媽媽們嘅抑鬱症狀較多。

Photo from MamiDaily

另外，報告亦指出爸爸同媽媽唔會因為要湊仔放棄其他活動而傷心，佢哋都非常樂意同小朋友互動交流。研究人員發現，唔同性別嘅心情原來同育兒有關係。相比女性，原來男性喺照顧仔女時更開心，幸福感竟然更高！

Photo from MamiDaily

研究負責學者Katherine Nelson-Coffey解釋原因或者係同心態有關，爸爸同小朋友一齊時，係以「一齊玩」嘅角度出發，而媽媽就係以照顧小朋友嘅心態，因此要擔心嘅事相對較多。

Text：Mami Editorial