幼兒便祕大絕招

「BB有便便喇！」依句說話應該會係爸媽聽到最開心嘅說話～好多媽媽都會知，BB到約6個月至3歲便秘問題可能會漸漸出現，面對依個問題，究竟爸媽們喺飲食上可以做啲咩幫BB解決便秘問題呢？

Photo from mamiDaily

準備加固食物時 可多選果蓉&碎菜

註冊營養師陸蕙華接受訪問時指出，大部分BB6個月大後開始進食固體食物，媽媽準備食物時可以提供果蓉同碎菜等較高纖維食物，例如：菠菜同西蘭花等，而且要注意給予足夠水份畀BB，有助預防同改善便秘問題。

大人細路都一樣 足夠水份就最好

每日攝取足夠水分／流質都係解決同預防便祕嘅重要一環。每日飲幾多水對小朋友嚟講暫未有一定標準，但衛生署喺兒童健康資訊就建議每逢正餐同茶點時間最少要飲一杯。而爸媽想知小朋友夠唔夠水份就可以觀察小朋友小便情況，約每3至4小時有一次小便，小便呈淺色而氣味唔濃，就表示已攝取足夠水分！爸媽都要多製造機會畀BB飲水，例如多提醒小朋友飲水同將水放喺幾個小朋友隨手拎得到嘅地方。

從飲食攝取膳食纖維 

食物含豐富膳食纖維有助小朋友解決便祕問題。兒童每日所需嘅膳食纖維份量，係年齡+5克。營養師指，除咗一般蔬菜類外，媽媽也可選擇高纖維五穀類食品，例如：糙米飯、全麥麵包、蕃薯等；而衛生署亦建議，爸媽喺準備午晚餐時，可選含豐富膳食纖維蔬果，例如紅蘿蔔、南瓜、菜心、橙、蘋果同西梅，而一啲高水分蔬果，如冬瓜、西瓜同梨等食物都有助幫BB補充水分！同時，營養師亦提醒小朋友要避免食太多零食同加工類嘅食物，因為依類食物大部分得好少膳食纖維，而且易令到小朋友對正食冇胃口。

生活要有規律 定時定後3餐最重要

生活上，原來食冇定時，或者休息時間混亂同如廁規律欠佳，都會導致BB便祕。營養師提醒，小朋友嘅3餐同正餐間嘅2次嘅茶點時間都要定時定候，因為依啲飲食規律會影響排便情況，同時鼓勵要有足夠運動，由簡單嘅收拾、跑跑跳跳至較劇烈的打球、跑步，都能有助消化系統活躍，而BB亦可以用按摩幫助腸道蠕動！

另外，營養師都唔建議媽媽自行決定或使用幫助去便嘅補充品，除非醫生建議後！最好都係從飲食方面改善BB便便問題，但如果便祕情況冇轉好，要儘快去求醫呀！

有時媽媽會以為小BB細個時便秘，到長大後情況會改善，但事實上，小時候有便秘到長大後出現便秘嘅機會更大，因為神經已隨著時間慢慢變得遲頓，導致會急大便嘅感覺都變差，而且據台灣有研究指出，有便秘嘅小朋友，平均較同齡矮，所以小朋友便祕問題不容忽視！

便便小資訊

根據衛生署資料指，BB便祕唔係指「冇屎屙」咁簡單，以下都係便祕嘅症狀：

-不規律或相隔一段比平常長時期先有大便
-大便呈乾硬大塊或細小彈丸狀
-排便吃力或有痛楚，會忍住唔肯排便
-大便好臭，臭屁極多
-不規律排便之間有腹瀉或喺褲子內遺便
-間歇腹痛或腹脹
-肛門因受硬糞擠壓而損傷
-大便混有血絲
-胃口差
-無精打彩、易發脾氣

其實BB由飲母乳轉飲配方奶，或轉配方奶時，都可能出現短暫性嘅便秘。但面對長時間便祕時，爸媽們就可以試下或留意文章剛剛提到嘅方法喇～

Photo from 營養師陸蕙華 Denise Luk -香港營養師協會認可營養師 -加拿大註冊營養師

Text：mamiDaily

Sources：衛生署 & 營養師陸蕙華