BB化身問題大王 5大常問問題類別

自從學識講嘢之後，BB日日夜夜講唔停！好奇心重嘅仔女們見到咩嘢都會問一餐，問到媽媽就快爆炸啦！相信好多BB都會瘋狂問以下5個類型嘅問題，唔知各位媽媽又認唔認同呢？

Photo from Mamidaily

1. 要求類
成日問「可唔可以⋯⋯」例如食飯時，問可唔可以加啲飯飯？行街時，問可唔可以買玩具？沖涼時，問可唔可以玩水？無聊時，問可唔可以睇卡通片？

2. 解說類
最常聽到嘅問題一定係：「點解嘅？」 去到邊都可以聽到佢問！例如喺屋企樓下見到一棵樹，已經可以衍生出「點解有嘅？」、「點解咁大嘅？」、「點解綠色嘅？」、「點解唔放嗰邊嘅？」媽媽們真係絞盡腦汁！

3. 人物類
呢種問題就要睇吓BB當日心情如何～ 心情好嘅就見到人就問「邊個嚟㗎？」；冇乜心情時，就通常無視全世界！

4. 靈異類
一到夜晚真係心驚驚，BB成日語出驚人！有時食完飯帶佢落公園玩，冇啦啦望住一個位揮手打招呼都算啦，仲要問：「媽媽，嗰個哥哥邊個嚟㗎？」明明嗰度咩都冇，叫媽媽點答啊！

5. 冇答案類
冇答案類問題真係世紀大難題！有時同BB一齊睇書，佢望住隻恐龍問媽媽邊度有得睇恐龍，媽媽同佢解釋恐龍已經絕種，世界上已經冇晒恐龍，BB又會問點解！其實真係好難答落去⋯⋯（嘆氣）

Text：Mami Editorial