【人奶路滴滴皆辛苦 點滴在心頭!】

【人奶路滴滴皆辛苦 點滴在心頭!】

爸媽分享 mami熱話 孕媽Daily 育嬰貼士
By孫師奶的媽媽日記 on 20 Jun 2019

孫姑娘出世的時候,體溫稍微低左少少,醫院建議留係兒科病房觀察,於是乎我自己一個留係產後房休息。

母乳姑娘入來教我用手擠母乳,但我嘗試咗差唔多半個鐘都係一滴都無,果一刻真係心如刀割,覺得自己好無用。同房的BB久唔久就喊,每隔幾個鐘就有姑娘入來叫醒其他媽媽餵奶,我好無奈又起身嘗試手擠母乳,依然係「無料到」!

朝早工友姐姐入來推其他BB去沖涼,姐姐揭開我的床簾話「呢度無BB喎」﹐說者無心,聽者有意,我即時喊左出嚟 T________T

產後第二朝可以落床,我就去兒科病房探孫姑娘,順便學習埋身餵母乳,下午又試,晚上再試,試來試去都係「無料到」!!!眼見其他媽媽係產後房餵奶,自己又無能為力咁,真係好難過。

產後第三日中午可以出院了,返到屋企我唔忿氣,拎個奶泵出來試下,終於見到傳說中的

「黃金初乳」,真係點滴皆辛苦,開心到難以形容,即刻放入冰格冷藏,叫老公送去醫院俾孫姑娘享用。老公話孫姑娘食得津津有味,唔知係氹我開心抑或係真有此事,果一刻真係非常滿足,心都溶化埋!

廣告
廣告

孫姑娘就快滿5個月,我也曾經懷疑過自己無奶、俾孫姑娘咬損乳頭、亦經歷過「石頭胸」、谷奶谷到發燒等等,呢條人奶路真係唔易行!但我覺得「搏盡無悔」,盡咗力就好了,有人奶就餵人奶,唔夠就補奶粉,奶粉一樣有營養,只係人奶多了一份母親的心意!

人奶路真係好需要家人的額外支持,家人真係需要言行一致去支持,俾多少少耐性和空間……

==============================

Text & Photos:孫師奶的媽媽日記

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Share to Facebook