【點解要報？】幼兒返Playgroup 5大好處 唔止仔女 家長都有得益！

現時好多家長都會為小朋友報Playgroup，希望喺佢哋正式返學之前，可以先接觸多啲同齡嘅小朋友，甚至學到一啲知識技能等。究竟畀小朋友返報Playgroup，有咩好處？今次就同大家講解吓。如果各位家長都考慮緊幫唔幫小朋友報Playgroup，不妨睇完再決定。

1. 促進腦部發展

坊間有各式各樣嘅Playgroup，唔同種類嘅Playgroup，課程都唔同。不過大部分Playgroup課程都係針對小朋友而設計出一系列適合佢哋嘅遊戲，畀小朋友可以透過遊戲中學習，促進佢哋嘅腦部發展。

Photo from Mamidaily

2. 小朋友學習自理

喺Playgroup上，其實導師除咗會同小朋友一齊玩之外，亦會從中訓練佢哋一啲自理能力。例如自己著鞋除鞋、進食前要洗手、聆聽導師指示等。畀小朋友學識獨立，同時令佢哋加快適應幼稚園嘅生活。

Photo from Mamidaily

3. 提升溝通技巧

依家好多小朋友都係獨生仔女，小朋友平時喺屋企只有同父母長輩或外傭相處，較少機會可以接觸到同齡嘅小朋友。畀小朋友參加Playgroup，除咗可以令佢哋有多啲機會接觸到其他小朋友，一齊玩之外，仲可以加強佢哋同人溝通嘅技巧，同學識與人分享同禮讓等等嘅小細節。

Photo from Mamidaily

4. 建立良好親子關係

Playgroup除咗對小朋友有幫助外，對父母都有好處，特別係新手父母或在職父母。家長抽時間陪小朋友一齊上堂玩遊戲，唔單止可以帶畀佢哋更大嘅安全感，仲可以同佢哋有更多接觸同交流，促進親子關係。另外，家長亦可以喺Playgroup中觀察小朋友嘅表現，了解佢哋對邊樣活動特別有興趣，有咩長處或潛能，從而加以培養。

Photo from Mamidaily

5. 家長識朋友

同小朋友一齊上Playgroup時，可以從而結識到其他家長，大家嘅小朋友差唔多年紀，較容易擁有共同話題，大家下以互相交流育兒或升學心得，例如：心水幼稚園、親子好去處、嬰兒食譜等等。小朋友喺Playgroup識新朋友嘅同時，家長都一樣得！

Photo from Mamidaily

Text：Mami Editorial