【父母必睇！】拆解選擇Playgroup 5大常見問題

好多家長喺仔女讀幼稚園之前，都會幫佢哋報Playgroup。不過坊間愈嚟愈多Playgroup，究竟應該點揀先啱？今次綜合咗一啲比較常見嘅問題，等大家可以參考一下。

1. 幾歲開始返Playgroup？

雖然唔少Playgroup課程都有劃分年齡組別，但家長切勿太心急，建議1歲或以上先報讀Playgroup課程。比起學習，太細嘅嬰幼兒更需要係休息同父母嘅陪伴，加上佢哋嘅狀況較難控制同掌握，例如扭眼瞓，要換尿片等。

Photo from Shutterstock

2. 咩類型嘅Playgroup比較好？

家長為仔女選擇Playgroup時，應該喺佢哋嘅角度出發，建議先了解觀察仔女嘅學習能力同不足之處，再作決定。例如：仔女嘅集中能力比較低，鍾意新鮮感，可選擇報讀綜合類嘅Playgroup，畀佢哋嘗試多啲唔同嘅新事物，並從中發掘佢哋嘅興趣喜好。到小朋友再大啲，開始識聽指令，受到控制時，就可以畀佢哋試下報讀單一類嘅Playgroup，如樂器、語言等，慢慢培養佢哋嘅興趣。

Photo from Shutterstock

3. 陪唔陪小朋友上堂？

好多家長幫仔女報讀Playgroup嘅其中一個原因，都係希望佢哋可以快啲適應到校園生活，想佢哋有獨立能力。因此覺得如果陪小朋友一齊上Playgroup，就會冇咗個意義。不過，其實小朋友面對陌生嘅環境同人，係會不安及產生恐懼。所以建議家長喺小朋友1歲至歲半期間，盡可能都安排親子形式嘅Playgroup，為小朋友建立安全感之餘，亦可藉此同小朋友增進感情，建立更親密嘅親子關係。

Photo from Shutterstock

4. 用英文上堂嘅Playgroup，可以學到更多嘢？

家長應先考慮小朋友嘅能力，如果小朋友連母語都未識聽，未識講，就為佢報讀英文Playgroup，急於要佢學習新語言，可能會出現反效果。好容易令小朋友造成混淆，最後廣東話同英文都學得唔好。

Photo from Shutterstock

5. 價錢貴啲嘅Playgroup，質素較好？

坊間嘅Playgroup課程，有平有貴，家長除咗要考慮經濟能力外，最重要係要考慮小朋友嘅需要同能力。如果小朋友年紀太細，就為佢報讀舞蹈班、樂器班等，其實意義並不大。另外，家長喺選擇Playgroup課程時，如設有試堂，應帶仔女去試一試，多觀察佢哋嘅反應，並了解佢哋上完堂後嘅感受，再作考慮，切勿以價錢去斷定Playgroup嘅質素。

Photo from Shutterstock

Text：Mami Editorial