【PLAYGROUP謎思 爸媽要點決定？】

唔經唔覺...小雨已經一歲啦...媽媽谷早早已經討論PLAYGROUP問題...一個同區17-18年媽媽谷...已經睇過唔少媽媽討論過PLAYGROUP同N班問題...攪到我開始越諗越多...究竟小雨要唔要去PLAYGROUP呢???

其實...我發覺大部份媽媽想小朋友參加PLAYGROUP...係想可以行早一步...為小朋友入讀名校舖路...原先由幼稚園到N班...再到PN班...再到PLAYGROUP...由原本要識行先可以參加PLAYGROUP到只要識企就可以參加...再到宜家半歲人仔就可以參加PLAYGROUP...究竟要早幾多步呢???

事實上...家長們只係怕...

怕小朋友報讀幼稚園會輸蝕...

怕小朋友幼稚園 INTERVIEW 表現不似如期...

怕小朋友一下子番幼稚園會唔適應...會爆喊...

怕小朋友上到幼稚園會落後過其他小朋友...

不過...面對住競爭...我明白家長們不得不追住跑...要小朋友文武雙全...要精通多國語言...最好係十項全能...學樂器由以往小數人會學下鋼琴同小提琴等等...(我個年代唔係個個有錢學架...)到變左普遍通學既樂器...再到宜家要學一D講左我識條鐵既樂器...老實講...我真係有點汗顏...究竟要走前幾多步呢?

星月係沙士之後一年出世...入學競爭未有咁激烈...個陣我只係報左一間幼稚園...完全唔擔心幼稚園唔收...只係需要考慮讀上午定下午既問題...

到十四年後...

星雨就不得不認真諗一諗...眼見媽媽谷有兩胎既媽媽分享第一胎報讀幼稚園既辛酸...令我心思思想為幼稚園舖路同星雨報讀PLAYGROUP...不過...同我既妹妹討論過一輪...決定唔報...讓星雨自由發展啦...開開心心咁享受BB時期...
萬事就入讀幼稚園再算啦...

好多人會覺得PLAYGROUP可以幫小朋友增廣見聞...等小朋友早少少接觸新事物...學多少少...等小朋友唔會咁怕陌生人...唔會咁痴身...要接觸新事物一出街就得...我覺得可以慢慢來...怕陌生人只係一時...小朋友好快可以適應...要痴身只係頭幾年...遲下你想痴就只有回味啦...我只要星雨行自己要行既路就算了...

同月同日出世谷...有人未學爬先學行...有人已經認到顏色...有人已經識得叫爸爸媽媽...個個小朋友係有唔同發展...唔需要去比較邊個叻D...早發展唔一定叻過人...遲發展又唔一定差過人...相信自己既BB喺自己發展路上會一直進步...從旁去協助就好了...

既然決定一手一腳湊星雨...當然要包埋教啦...日常生活細心指導...基本既禮儀同認知能力應該不成問題...同星雨去下街去下公園接觸下其他小朋友...自自然然發展社交能力...每日抽時間同星雨講下故事...唱下歌仔...星雨一樣可以慢慢學習...

容我成為星雨身邊最信任既伙伴...伴隨住星雨慢慢長大...我堅信世上沒有一套一定得既育兒方法...只有尋找出自己一套既育兒方法...自己點教...自己感受...自己承受...

付出時間去陪伴星雨...我覺得好重要...從出世到番幼稚園前建立既親子關係...將來好有用...面對住競爭超大既教育制度...我們只能默默接受...一番學就要開始有爭拗...有強硬...有磋商...有討價還價...有妥協...每一個考驗絶對會為親子關係帶來一個又一個衝擊...願我倆最後能一一安然渡過...繼續我倆的親子關係...我唔係要否定PLAYGROUP既存在價值...報唔報讀PLAYGROUP 只係我自己個人選擇...我始終想日日痴住星雨...讓星雨可以無憂無慮咁笑...

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：MR. MOON & RAIN 甜心小屋

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！