唔係唔想湊B 3個湊B湊到叫救命嘅星座媽媽

「江山易改 本性難移」話就話生咗BB會為BB改變，但對於依3位星座媽媽嚟講可能真係難過登天，如果你成功改變到，真係要畀啲掌聲自己。

1. 雙子座媽媽

雙子座媽媽個性易變，自己其實都係小朋友，鍾意玩樂，對於不受控嘅BB，雙子座媽媽容易處於崩潰狀態。

一開頭雙子座媽媽都會覺得湊B生活會多姿多彩，但當遇到困難，就會開始放棄，甚至會突然唔再去做。而且湊仔女時，雙子座媽媽會當小朋友係大人般照顧，重視同小朋友嘅溝通，但如果對於細B嚟講，點會理你咁多呢？所以好容易遇到挫折。

而且多變性格，會成日出現言行不致，雙子座媽媽隨住自己心情變化，改變湊B規則，心情好時，BB做咩都好，絕對係溫柔媽媽，但心情唔好時，暴躁主婦就會上身，仲會質疑自己點解會咁慘！所以對於鍾意創新、有新意嘅雙子座媽媽只要湊仔時可以去下旅行／多啲出去參與活動都可以勉強過到日子，但如果成日要同小朋友困獸鬥，無耐性指數一定會飆升，同小朋友關係都較容易出問題。

Photo from Shuttertstock

2.水瓶座媽媽

水瓶座媽媽善變指數比雙子座媽媽更嚴重，今日要畀BB試新衫，聽日又想BB學新嘢，但如果係固定嘅湊B時間表，水瓶媽媽都容易叫救命。

水瓶媽媽要好多創新事物激發自己對湊小朋友興趣；佢哋唔係唔想湊B，而係一定要身兼多職。因為天生鍾意追求潮流，例如要知道最新書籍同電影，但湊B個陣好多時都唔可以做到自己嘢，所以對於水瓶媽媽嚟講冇咗MeTime係最接受唔到嘅事。

加上推崇獨立自主，會成日希望小朋友唔好依賴自己，但BB事實上係需要陪伴，所以要水瓶座媽媽長時間同BB獨處，一係有新奇育兒方法畀水瓶媽媽做測試，一係BB好獨立，但睇嚟都要等下～

Photo from Shutterstock

3.射手座媽媽

射手座喺12座星座中最熱愛自由，係一個非常嚮往生活體驗同自在生活嘅媽媽，湊B時大多數以放牧式方法湊B，但對於無興趣嘅事就會完全無耐性，所以如果係被逼要湊B嘅射手座媽媽嚟講，係一大苦差。

但做射手座媽媽嘅仔女都幾幸福，因為媽媽一定會不斷發掘新地方，不斷散發能量，但射手媽媽係善忘一族，有時答應小朋友嘅事，可能只係隨口講下，令小朋友失望。

所以射手媽媽湊B時最易叫救命就喺，BB好細嘅時候，因為唔可以去太遠嘅地方玩，當BB大個咗湊B對射手座嚟講都無難度。

其實星座依家嘢都係從另一方面更加了解自己，大家都係想自己進步，做個好媽媽，不妨參考一下，可能可以幫吓自己湊B呢～

Text：Mami Editorial
Photos：Shutterstock