夫妻養育孩子2年唔再相愛? 日研究：關鍵在於老公

日本Benesse次世代育成研究所曾訪問300對夫妻，搜集媽媽們由懷孕到小朋友出生後2年期間嘅心境變化數據。結果發現超過7成嘅懷孕媽媽都會表示自己好愛另一半；但係只有3成左右嘅媽媽喺小朋友2歲時仍表示仲愛著對方，比例明顯大幅下降。

Photo from Shutterstock

研究中好多日本媽媽表示，最令自己無法繼續愛老公嘅原因，係小朋友出生後只有自己盡力做好媽媽嘅責任，但係老公就無法完全切換到爸爸模式。當媽媽為照顧小朋友而日做夜做又唔夠瞓嘅時候，另一半即使放工後仍去聚會應酬，全然將所有家事、孩子通通丟俾媽媽一人處理晒。即使係假期，都仍然冇盡做爸爸嘅責任帶小朋友去玩，反而係自己去消遣。

Photo from Shutterstock

長期感受唔到另一半為家庭付出任何心思，令媽媽們都感到心灰意冷，認為家庭只得自己同小朋友，另一半就好似係局外人一樣，令感情變得愈黎愈淡。

研究人員表示，最影響夫妻關係嘅關鍵係丈夫對太太嘅關懷、對屋企事務嘅關心、湊小朋友嘅投入程度。如果丈夫多對妻子講「辛苦你」等體貼嘅說話，妻子亦多稱讚丈夫參與家事嘅表現，足以令愛情歷久常新。

Photo from Shutterstock

另外，夫妻雙方一齊分擔育兒工作，大家都能夠深深體會到為人父母嘅苦與樂，有更多相同嘅感受同可分享嘅話題，除咗令雙方時刻保持著共同進退嘅親密戰友關係、促進雙方感情外，亦有效促進親子關係。

Text：Mami Editorial

Photo Source： Shutterstock

Source：Benesse次世代育成研究所