【老公這角色在孕期其實很重要】

早幾篇blog都提及過懷孕初期心理壓力對媽媽黎講都係一種負擔，而且並唔係每位媽媽都願意將呢種負擔分享/轉嫁俾另一半，麻咪本人就係一個例子。

總覺得老公做管理層，返工壓力其實可能已經好大，而佢身份角色由老公到爸爸，相信心理壓力唔會少過媽媽，特別係男性普遍唔會好似女性咁天生有種母性，理論上應該比媽媽較遲習慣到將為父母嘅身份，所以我當時決定將所有濕碎感覺同變化都自己收埋唔多講，有啲咩事都自己解決，夜晚抽筋唔會拍醒佢，就算有啲事老公唔理解，認為係我無理取鬧，一時一樣，我都冇花力氣去解釋。

「別對牛彈琴，牛聽不懂，牛也很煩」，直到中後期，大約係呀b有微微胎動，老公都努力想去share呢個0.01秒嘅moment，朝早佢換衫返工時聽到我嗌就即刻9秒9衝入房睇下我做乜，見到佢勁緊張個樣，麻咪終於發現自己一直剝削左另一半盡老公責任嘅權利。

又直到宜家已經35週，小珍珠愈來愈大同有份量，麻咪左瞓右瞓都係瞓唔到，每日都係天光先恰得著，麻咪又發現原來有老公喺臨瞓前按摩幾下係易瞓著好多(不管係求其按定認真按)，其實老公任何形式嘅支持都真係好重要。

再加一個題外話，相信大家一發現懷孕，都會join一兩個媽媽group，當然麻咪本人都唔例外，每日其實會聽到好多c6/62/99嘅‘‘消息‘‘

呢個都係我有感而發出呢篇blog嘅原因，我好幸運，我並冇任何負能量可以喺谷內發放，老爺奶奶一直都好錫我同小珍珠，我相信好多時好多事都係雙向，老公夾喺中間有時都好難做，(但老婆脾氣佢都係必須硬食的)都係同做人道理一樣，你唔理解嘅事，唔代表係錯，最重要係互相尊重體諒包容。

懷孕期間其實並唔係媽媽一人孤身作戰，不論係爸爸定寶寶，大家都努力中，正如一段關係開始都需要不斷磨合，一個家庭都需要呢個過程，

希望呢篇分享可以鼓勵所有準備/剛剛/懷孕中/已生寶寶嘅父母，多啲溝通同體諒另一半。

Don't let the silly little things steal your happiness

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Stefani Ngo

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！