隋棠大仔呷醋經常打人 扮送走妹妹 哥哥即反對！
「手掌又係肉，手背又係肉」，爸爸媽媽睇住仔女吵架，有時真係好頭痕。台灣女星隋棠大仔Max因為呷醋，經常欺負妹妹Lucy，而呢個情況已經持續一段時間。今次隋棠除咗分享解決仔女爭寵問題外，更發現「兄弟姊妹永不分離」呢個道理，真係令人好感動！
台灣女星隋棠同老公Tony婚後育有2子1女，大仔Max、囡囡Lucy同埋細仔Olie，一家五口非常熱鬧。佢經常同網民分享3個仔女嘅生活點滴，有時又會分享育兒心得。
早前，佢喺社交網站度指，有咗囡囡後，大仔Max經常呷醋。最高峰時期，Max時常偷打妹妹，有時唔想同妹妹分享嘅時候，仲會好大力咁推開佢，屢勸不聽，令佢冇晒辦法。軟嘅唔得，唯有強硬一啲，隋棠逼於無奈就同Max講：「如果，媽媽請阿嬤幫我們照顧妹妹，就是，是妹妹住在阿嬤家那種哦，那以後家裡就只有爸爸媽媽跟你一起，這樣是不是你想要的呢？」當時Max呆一呆，硬頸地話好。
事隔半年，Max毫無預警咁同隋棠講：「媽媽，妳不要把妹妹送去阿嬤家，Maxie很愛妹妹。」原來話要送走妹妹啲對話，一直深深咁留喺Max嘅腦海，當得到媽媽回應：「好，不會送，媽媽也捨不得」，Max依然非常倔強地同媽媽強調除咗自己之外，好多人都唔捨得妹妹。言下之意，假裝只係其他人唔想同妹妹分別，同自己冇乜關係，令隋棠哭笑不得。
Max雖然呷醋爭寵，怕爸爸媽媽唔再錫佢，不過對妹妹嘅愛大過所有恐懼，兄妹情深就係咁嘅一回事。自己嘅弟弟或妹妹，只可以自己欺負，一聽到要送走佢哋，個心都離一離，真係絕對不能接受。今次嘅爭寵事件，令隋棠發現囝囝已經開始成長，難怪佢見到囝囝咁暖心「保護」妹妹，會感動到想喊啦！
Text：Mami Editorial
Source：隋棠 @Facebook
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
