湊成「好」字嘅爸媽最清楚，仔囡鍾意嘅嘢好唔同

仔又好，囡又好，都一樣可愛。佢地鍾意嘅嘢好唔同，相信有一仔一囡嘅爸爸媽媽，一定深深體會到佢地嘅唔同之處。

1. 仔囡介紹爸爸媽媽識嘅卡通人物

因為囡囡，爸爸會識得唱「Let It Go」（冰雪奇緣主題曲）；因為仔仔，媽媽見到蝙蝠俠同蜘蛛俠嘅產品時，會望多一眼。仔囡令爸媽去認識嘅卡通人物，有啲可能一樣，但大部分都好唔同呢。

2. 幫小朋友買衫嘅數目

女孩子嘅衫褲鞋襪，種類多、顏色多、款式多，而且選擇真係好多。相信有仔仔嘅媽媽，都會好明白，男孩子嘅服式，真係得好少選擇。所以，成功購物嘅比例，唔講都知道喇。

3. 幫小朋友整理頭髮嘅時間

仔仔洗完頭，抹幾吓就乾晒，基本上唔需要用風筒吹頭，相比女孩子，好慳時間。朝早起身之後，男仔最多用梳整理一吓；女仔就唔同，可以紮馬尾同孖辮，仲可以鬢辮。

4. 鍾意嘅玩具

雖然話小朋友嘅玩具種類係無男女之分，但現實就係，有仔仔嘅屋企，多數會有好多車、火車、恐龍同埋超人玩具；而有囡囡嘅屋企，多數會有好多粉紅色主題嘅玩具，又會有玩具BB同埋公主套裝等等。

5. 鍾意嘅書

仔囡可以睇同一本書，亦會鍾意同一本書，但仔仔總會較鍾意睇一啲同車、恐龍、機械、同埋科學有關嘅書；而囡囡呢，有關公主、動物嘅主題，又或者主角係女孩子嘅書，應該會多一啲喇。

Text: Mami Editorial

Photo Source: Shutterstock