市面公仔都「完美」易令患病小朋友感自卑

幾乎每位小朋友對公仔都係愛不釋手，原因係公仔對小朋友嚟講有一定程度嘅慰藉。美國就有位社工，為身體有殘缺同不幸患病嘅小朋友度身訂造公仔。

社工Amy曾經喺兒童腫瘤科病房工作，佢發現公仔能幫助唔少病童表達自己，但可惜，市面嘅公仔都係「完美」，四肢健全，頭髮濃密等等⋯⋯令到一啲患病嘅小朋友，例如患白化病或因病截肢嘅小朋友更易覺得自卑，所以4年前就忽發奇想開始咗「A Doll Like Me」計劃。

Amy按照病童嘅特徵縫紉出與佢哋自己外型相似嘅專屬公仔，希望透過依啲公仔話畀小朋友聽，即使身體上有缺憾，佢哋仍然完美，佢哋仍然會似個啲公仔一樣受到人愛戴，身體上嘅不同都只係「特徵」而已。

有爸爸媽媽請Amy為失去雙腳嘅囡囡製作公仔後，拍攝一段影片，片中小朋友十分驚喜，而且同媽媽指出「佢同我一樣，佢都係要裝上義肢，但佢好可愛！」媽媽亦和應指：「所以你都好可愛！」

Amy指，公仔嘅模樣對於四肢不健全或患有兔唇嘅小朋友心靈影響尤其大，大人無法想像或清楚估計公仔對小朋友影響有幾大，幾乎每一個公仔都藏有多種情感。

A Doll Like Me計劃推出後，短短兩個月已經接到超過200張訂單，Amy指「每次收到訂單後，我都會要求爸爸媽媽畀好多相我，有時我會全日喺度睇嗰嗰小朋友嘅相，感受佢嘅生活，跟住留意佢嘅特徵，希望真係可以做到同佢哋一模一樣嘅公仔！」

Amy依個計劃係希望有更多小朋友從公仔身上得到慰藉，Amy指會一直做落去到自己已經無法縫紉。

Text：Mami Editorial

Sources：Today