小朋友匿埋惹到大人哭笑不得 原來搞笑背後有原因

小朋友從細細個開始就好鍾意玩匿埋，但係每次匿埋都惹到大人哭笑不得，因為好多時小朋友合埋眼就以為自己匿埋咗，大個小小就識揾嘢遮住，但都會露出一大半身，但小朋友心中都以為自己匿埋得好成功！

有爸爸媽媽分享自己小朋友係玩匿埋時搞笑相，都不約而同話「小朋友以為自己睇唔到，其他人都睇唔到」、「有時見小朋友咁落力匿埋，真係唔忍心揾佢出嚟！」、「玩捉伊因同時都係爸爸媽媽演戲嘅時候呀！」

但其實小朋友依種「掩耳盜鈴」嘅方法係有原因㗎！有心理學家曾經以著名實驗「三山實驗」解釋，7歲前嘅小朋友嘅守恆概念仍然發展中，小朋友會認為自己睇到嘅＝其他人睇到，暫時未識從他人角度出法，所以玩匿埋時，遮住自己雙眼時，就以為自己匿埋咗！爸爸媽媽亦唔洗心急同BB解釋，因為BB根本唔明你講咩，而且都唔好取笑佢哋，咁樣反而會令小朋友覺得自己做錯事。

守恆概念其實係說明幼兒早期認知發展，指出唔同年齡層嘅小朋友係了解某一物體其外表改變時，由以為其物件係另一物體到得知到其實係同一物件嘅發展過程。例如，當用相同大小嘅泥膠捏成圓形同長方形時，對於3-4歲嘅小朋友就會覺得，長方形會有較多泥膠，但實際上係一樣，依種就係守恆概念嘅意思，係發展邏輯嘅重要基礎！

其實玩匿埋，對小朋友有好大好處。除咗令到小朋友開始了解守恆概念外，更開始訓練小朋友記憶力、空間概念同想像力。亦有研究指出，爸爸媽媽同小朋友玩匿埋時，可減低小朋友分離焦慮，因為令小朋友知道，當爸爸媽媽離開一陣後，其實都會再返返嚟！所以今日又同BB玩吓捉伊因喇！

Text：Mami Editorial
Sources：華人百科
Photos：Pinterest