【加固飲食】新手媽媽升Lv記｜媽媽變廚神！？

話咁快蠔豉妹妹就由手抱變成拖手了～

其實由加固後，我就覺得蠔豉妹妹唔再係BB～

一開始想行BLW嘅我，最後都行返傳統餵食⋯⋯千祈唔好一半BLW 、一半傳統，因為會好易令BB混淆吞食方法，咁樣會好危險！

由一開頭食下奶糊，到之後食下米粉、意粉、通粉～

食粉既時候主要都係加南瓜、紅蘿蔔、西蘭花咁；雞肉都會加下，不過其實都係食下嗰味～

到一歲之後就開始食白飯加餸，因為蠔豉妹妹唔鍾意食粥，所以我都無乜煲過 :p

係整餸方便（其實都無乜技巧可言），煎下蕃茄洋蔥蛋卷、蒸水蛋、無油炸雞翼、煎魚、烚下菜咁，可能你會話：「一歲就食又煎又炸！食蒸好啲！」其實我一開頭都係乜都蒸同烚，不過因為連調味都無乜，所以蠔豉妹妹揀食白飯就算⋯

之後我就決定加少少調味～煎或炸雞翼就剪走雞皮！果然～佢就食到津津有味！15個月大就大概可以食半碗飯加2雞翼、少少蛋再加菜～不過唔知係咪行過BLW嘅原因，蠔豉妹妹都係偏向鍾意用手多過用叉匙，不過我又無乜所謂，食到就okay！

18個月大之後，魚就成為蠔豉妹妹最愛！直頭取代雞翼！不過菜就唔多鍾意食⋯⋯變成鍾意食瓜：節瓜、冬瓜、勝瓜都食～

依家出街我地都會畀大人嘢佢食，例如日式蒸蛋、湯烏冬、煎魚、手卷～基本上唔辣、唔太鹹，我地都會畀少少佢

而生果就一直都係蠔頭妹妹嘅下午茶：香蕉、梨、士多啤梨、青提子，每日輪流食～！

8 - 15個月大都愛食米餅嘅佢，依家就唔多食，而改食白麵包、雙色包、提子包、pancake、西多士都可以～

以前做人老婆，我都係煮下啲簡單野，好彩到蠔豉妹妹既要求都唔太高！自問唔係煮野好好，最主要原因係懶！但如果整的話，蠔豉妹妹又肯食，我覺得自己廚藝又進一步 :p

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Pig Wing

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！