願意重新經歷一次10級分娩痛大寶5個改變令媽媽直言：「值得！」

By rachel.lo on 11 Mar 2019

好多媽媽生過第一胎後先真正深刻體會到十月懷胎嘅苦、生孩子嘅痛、照顧孩子嘅攰⋯⋯ 成為媽媽就係完全將自己生活嘅重心轉移到孩子身上，而最可怕嘅係，媽媽們都會心甘情願去為孩子全然付出，即使自己再攰再苦都絕唔會埋怨孩子。當孩子開始長大，慢慢想同其他小朋友玩同分享，但又礙於年齡差距無法融入其他哥哥姐姐當中，好多媽媽內心都會閃過一個念頭：「不如再生多一個孩子？」

終於，二寶出世喇！雖然會令媽媽嘅生活忙上加忙，偶爾會無法兼顧到大寶，令大寶認為媽媽偏心而唔開心，兩人間中爭寵嘅表現亦會令媽媽感到頭痛。但隨著日子過去，媽媽時不時耐心向大寶解釋、教導大寶點樣去接納二寶，兩個孩子愈黎愈識得同對方玩⋯⋯漸漸地，大寶都鍾意上二寶，甚至有時當媽媽想鬧二寶，大寶都會挺身而出保護二寶，大寶嘅一切改變都令媽媽感到非常欣慰同感動。

1. 變得有耐性

當二寶出世後，媽媽自然會將專注力轉投放喺年紀更細、需要全天候照顧嘅二寶身上，雖然大寶一開始會感到唔習慣，出現覺得係二寶搶走咗媽媽、媽媽偏心等等嘅負面諗法，但當媽媽耐性同大寶解釋返小寶寶嘅需要，教導大寶點樣去同小寶寶相處，一般大寶都會願意接納二寶嘅存在，甚至比媽媽更愛黐住二寶。當媽媽需要先照顧好二寶嘅時候，大寶會明白同學識等待，每次見到大寶乖乖等待媽媽嘅時候，都會令媽媽感到心疼又欣慰。

2.變得會照顧人

屋企多咗個小寶寶，大寶都會感到非常有新鮮感，而且會願意模仿媽媽嘅舉動幫忙照顧二寶，如幫手餵奶、拎尿片、看管小寶寶一舉一動、幫忙氹小寶寶等，盡顯熱心一面，令媽媽省卻唔少工夫。當小寶寶開始長大，大寶仲會教小寶寶各種事情，有一個模仿對象嘅二寶學習速度會更快呢！

3. 變得愛分享

平時屋企玩具只有大寶一個玩，但多咗二寶後，大寶終於感受到更多同人一齊玩嘅樂趣，學識將自己嘅玩具讓俾二寶玩、教二寶去玩。睇到大寶同二寶玩到不亦樂乎，笑得非常燦爛，而唔再係只扯著媽媽、央求媽媽放低手上工作陪自己玩，呢個亦係媽媽最樂於見到嘅畫面。

4. 變得更可靠

有一個比自己年紀小嘅「小跟班」，大寶都會變得可靠起黎，會幫媽媽睇實二寶，如：二寶亂走時會幫手捉實二寶、發現二寶偷偷將可疑物品塞入口會即刻搶走嗰樣物品、當二寶哭喊時會輕擁著二寶安撫⋯⋯因為有一個需要自己照顧嘅人，大寶都會變得更成熟，喺教訓二寶唔應該做咩行為嘅同時，亦係提醒自己唔好犯錯。

5. 變得更體貼

當二寶哭喊時，忙碌中嘅媽媽未必有時間立即去察看小寶寶嘅情況，唯有「聞聲而至」嘅大寶會立即衝去二寶身邊，用盡一切方法去安撫二寶，令二寶唔再喊。久而久之，大寶亦變得了解二寶哭喊嘅訊號，識得用咩方法先係最有效令二寶變返安靜，而呢啲相處模式亦會令大寶同二寶嘅感情日增，二寶亦會成為大寶除爸爸媽媽以外最愛護嘅人，亦完成媽媽當初誕二寶嘅最大心願 - 希望帶俾大寶多一個重要嘅親人。

有兩個孩子以上嘅家庭，雖然孩子會經常吵吵鬧鬧，每每令父母氣上心頭，但係爭吵亦係相處嘅一種，正所謂「不打不相識」，細個時常打打鬧鬧嘅孩子，通常長大後感情都會更好。父母未必可以陪孩子走到好遠嘅路，但係同有血緣關係嘅兄弟姊妹，就可以成為父母離去後，彼此身邊最親近可靠嘅親人之一，呢個亦係兩孩以上父母嘅心願。