餵咗人奶咁耐有冇覺得自己肥咗？ 產後媽媽餵母乳瘦身不成反增磅嘅3個真相

餵人奶好處多多就個個媽媽都知，其中一個非常吸引媽媽餵母乳嘅好處，就係會變瘦！好多產後媽媽都會好希望可以藉住餵母乳，順便將懷胎十月所累積嘅多餘肥肉減去，不過就有媽媽慨嘆，明明已經餵咗母乳一段時間，但根本無法瘦落黎，反而體重穩定上升，認為餵母乳會瘦呢個理論根本係「本世紀最大騙局」，大家又認唔認同呢？

外國曾經做過一項研究，發現產後純餵母乳嘅女性，即使熱量攝取相對高、運動量亦相對少，但其瘦身速度仍然快過混合餵食母乳同配方奶嘅媽媽。

純餵母乳嘅女性一天大約可以額外消耗300至500大卡，其中約有3分之1係黎自身體儲存嘅脂肪，不過點解會有媽媽反而愈餵愈肥呢？咁就可能同以下呢3件事有關：

1. 攝取過多熱量

經歷完懷孕嘅地獄戒口時期，產後媽媽終於可以破戒盡情食孕期中唔可以掂嘅食物，如雪糕、甜品等高脂、高熱量食物，最後吸收比消耗更多，通通都累積喺媽媽身上。建議產後媽媽要慎選高蛋白質食物，相比起高油高熱量嘅花生豬腳，食魚類唔單止有優質蛋白質、豐富DHA，而且熱量仲好低，冇咁易致肥。

2. 胃口大開

餵母乳嘅媽媽本來就會更容易肚餓，加上一心諗住餵人奶會瘦，所以喺飲食上無節制，令媽媽不知不覺胃口愈食愈大，由小食多餐，變成多食多餐，所以難以瘦落黎。

3. 缺乏運動

媽媽嘅一日都係湊BB中度過，可以話有空閒時間都寧願用黎休息、瞓覺。然而，減輕體重要依靠節制嘅飲食外，運動都係佔非常重要嘅地位。而好多媽媽都普遍認為，減重要至少做30分鐘帶氧運動先有效，現實中湊BB已夠攰，仲邊有多餘時間同心力去做運動？其實，輕量嘅運動都對瘦身有幫助，如每日起床同瞓覺前，喺床上做30分鐘空中腳踏車，都有助媽媽收肚腩、瘦大腿。

Text：Mami Editorial