請唔好再亂畀零食BB！ 媽媽難以開口推卻嘅3個「盛情」

BB可愛到令周圍嘅人心都融化！好多時媽媽帶BB出街，總會遇到親切嘅鄰居或陌生人，見到BB總會露出一臉慈祥，但係以下呢3個善意嘅熱情舉動，有時會令媽媽內心出現無數嘅讀白：「唔好呀！」、「好污糟呀！」但臉上仍要掛住微笑，唔好意思推卻人家嘅好意，再急急搵理由帶BB走。

1. 搣BB臉豬

BB通常塊面都肥嘟嘟好可愛，最常引起其他人如路人或鄰居忍唔住摵BB嘅臉豬，但係好多時都會令媽媽內心感到唔開心，一黎係對方未洗手怕將病菌帶畀BB嘅衛生問題，二黎係有啲BB特別怕生，好抗拒陌生人嘅觸碰，會令小BB受到驚嚇，無論邊個情況都會令媽媽心裡好唔捨得，但望住對方一臉好鍾意BB嘅模樣又唔好意思出言怪斥。

2. 抱BB

同上都係基於衛生同BB心理問題，另外氣味亦會令媽媽心驚驚，如身上有煙味嘅人士，或有啲男性身上噴古龍水、女性身上噴香水等具刺激性氣味，媽媽都會好怕呢啲化學氣味被BB吸入，會引起健康問題； 另外面上沾有唔同色彩嘅閃粉眼影等化妝品嘅女性，喺抱BB嘅時候有機會掉落到BB身上，或被BB左右掙扎時唔覺意嘴仔掂到而食落肚，亦會令媽媽臉色變得好難睇。

3. 畀零食BB

好多時長輩都會好疼愛小朋友，見面時都會將身上嘅餅乾零食畀BB，但由於湊BB嘅年代太久遠，好多時都會忘記咗小朋友幾大先可以開始食得呢啲零食。通常媽媽都會禮貌性代BB收下，但如果遇到有長輩「熱情」到親自餵BB食，媽媽就絕對難以「袖手旁觀」！

所以為免令場面尷尬，大家見到BB時都應盡量收儉一下自己嘅熱情，唔好令媽媽難做喇！

Text: Mami Editorial