美國媽媽痛失兒子但尊重仔仔意願將器官捐贈遺愛人間

By race.cheng on 30 Jan 2019

嚟自美國嘅Becky Turney因意外痛失19歲大嘅仔Triston，雖然要承受喪子之痛，但Becky仍然尊重仔仔生前意願，將器官捐贈，繼續遺愛人間。當Becky 以為自己無法再同仔仔相處時，竟然喺2年後婚禮重遇「仔仔」。

未婚夫知道Becky 對Triston念念不忘，決定喺婚禮上為Triston留下一席位，並代Triston喺座位上寫下一段感人說話畀媽媽：「今日係你嘅婚禮，但可惜我已經喺天堂，我點樣做好呢？我當然會嚟陪伴你度過依個重要大日子，所以記得留張櫈畀我，一張櫈就夠。雖然你睇唔到我，但係我永遠都會喺你身邊。」

當Becky以為自己以後只能思念仔仔，未婚夫竟然請來受助Triston心臟者Jacob到婚禮，畀Becky一大驚喜。未婚夫指：「今日雖然Triston本人嚟唔到婚禮，但係佢喺走前嘅選擇，為我哋帶來另一位年輕人嚟依度：Jacob！」

得知Jacob喺仔仔Triston嘅心臟受助者，Becky雙眼通紅，更感動咁用聽診器聆聽Jacob嘅心跳聲，仿佛同親仔仔見面一樣。Becky喊住話：「我完全想像唔到，原來見到Jacob時會喊到收唔到聲，我真係覺得好似見到Triston一樣。」喺佢哋互相擁抱時，全場賓客都好感動，更紛紛落淚。

Triston當年不幸離世，但仍然選擇器官捐贈，成功令5個病患者獲得重生機會，而Jacob就得到Triston心臟，成功續命。Becky指：「器官捐贈係最無私嘅行為，希望可以有更多人能夠支持器官捐贈，因為世界上仍然有好多人等待。」與此同時，希望Jacob同其他受助者可以繼續健康生活下去，就係Triston一家最大嘅願望。