不愧係世界上最美好單純嘅存在 BB教識父母嘅3件事

成為父母後，往往覺得自己要教會BB好多嘢。然而，凡事總係兩向，喺父母給予BB嘅同時，BB亦重新教會父母好多簡單但已經難以做到嘅事，以下三件事都不禁令父母感嘆，BB不愧係世上最單純無害嘅生物！

1. 知足常樂

BB對一切事物都充滿好奇同熱情，好多大人絲毫冇放在眼內、或冇認真注視過嘅小物件，如食物包裝紙、卡片、衣夾等⋯⋯BB總會睜大雙眼望到定一定，千方百計拎到手再研究一番，然後卡卡笑唔停。好多大人都會被BB呢個反應感到驚奇：「咁都好玩？」相比起對好多事物都麻木嘅大人，BB好容易就會感到滿足同快樂，簡簡單單就搵到笑嘅理由。

2. 唔記恨

當BB做咗曳曳行為激嬲爸爸媽媽，或爸爸媽媽搶去BB手上嘅禁玩物品，而令對方唔開心時，最快嬲完嘅一定係BB。喊過一陣後，BB又會開開心心咁走向爸爸媽媽身邊，撒嬌討抱，就好似咩事都冇發生過一樣。相比起一件小事或誤會足以嬲一日、一星期、一年嘅大人而言，BB更容易放下生氣嘅情緒或面子，把握時間盡情去愛所愛嘅人。

3. 愛分享

BB即使未學識同年紀相若嘅孩子分享食物／玩具，但就會先學識給予同接受家人嘅物品。餅餅、煮飯仔玩具、毛公仔等BB日常嘅心愛食物或物品，總願意主動同熟悉嘅大人分享，當睇到大人開心咁接過自己嘅物品，BB會笑得非常燦爛！

Text: Mami Editorial