與仔仔相處12日係人生最幸福嘅日子

澳洲有媽媽放棄血癌治療，選擇繼續懷孕，希望能夠帶囝囝見到世界，但囝囝喺出世12日後就夭折，而媽媽病情亦惡化，最後相繼過世。

19歲嘅Brianna Rawlings喺懷孕4個月時發現自己罹患血癌，醫生指Brianna可以終止懷孕，或選擇繼續生小朋友，但就需要放棄治療。Brianna決定推遲自己治療，但懷孕期間，Brianna極度痛苦同不斷發燒，而且受到嚴重嘅血液感染，亦不幸傳染畀囝囝。

囝囝最後需要緊急剖腹產，更比預產期早三個月出世，但囝囝同媽媽只係相處咗12日，Brianna憶述同囝囝一齊嘅時間指：「依12日係我生命最美好嘅日子！」

囝囝過世後，Brianna無放棄自己指：「治療真係好艱難、漫長、疲憊同痛苦。但我知道，雖然囝囝唔再同我一齊，但佢畀咗力量我繼續戰勝！」

但可惜，Brianna病情突然惡化，甚至唔可以接受骨髓移植手術，只可以用藥物注射醫治，雖然藥費昂貴，家人到處籌錢，但Brianna接受2次注射後就已經不敵病魔病逝。

屋企人對Brianna離世好傷心，但覺得佢終於從痛苦中解脫亦覺得安慰，希望Brianna可以喺天國同囝囝團聚。

Text：Mami Editorial
Sources：The Sun