流感高峰期持續全港幼稚園停課

By race.cheng on 24 Jan 2019

流感高峰期持續，至聖誕假後流感不斷喺幼兒間傳播，唔少小朋友中招！截至23日，全港有372間幼稚園或幼兒中心停課，政府今早召開跨部門會議評估最新情況，有指決定周六起幼稚園提早放農曆新年假。

今早政府召開會議，決定全港幼稚園停課。政府指，留意到幼稚園或幼兒中心爆發流感嘅情況比以前高，數字處於相當高水平，尤其0-5歲流染率不斷上升，所以決定停課。

政於補充指，現時流感集中喺幼稚園傳播，而且評估到小朋友未必識保護自己，所以決定宣佈停課，提早放年假。有議員指，雖然停課決定係遲咗，但仍然可以中斷流感喺幼兒間傳播，而且提供更多時間畀學校消毒地方。

現時有74人因流感死亡，均為成年人。衞生署上周收集到7,707份呼吸道樣本化驗，當中2,288份或29.7%樣本含流感病毒，遠高於基線水平，亦創冬季流感新高。

上星期政府指幼稚園爆發情況達超高水平，但仍然未有即時作停課安排，唔少媽媽都擔心，諗究竟自行停課好唔好？有幼稚園老師更指，依段時間比平時仲忙，需要解答好多家長疑難，包括學校會唔會停課？現時學校學童因病請假嘅比率係幾多、會唔會有功課安排等等⋯⋯搞到人心惶惶，但現時可以停課，總算係可以真正中斷流感傳染，唔怕小朋友再互相感染。