李亞男BB可愛樣首度曝光 網民希望BB樣會再變

李亞男喺冬至健康誕下愛女Gabrielle，出世嘅時候爸爸祖藍指太似自己唔公開囡囡樣。老婆就襯住老公生日，終於公開一家三口嘅全家福，賀老公生日。

由李亞男公開懷孕後，一眾網民都好關注BB出世會似邊個，點知去到BB出世個日都睇唔到BB樣，真係引死一班網民。宜家見到BB就知原來祖藍無呃大家，BB真係好似祖藍，眼大大，鼻大大，臉型都似爸爸方方圓圓，但一眾網民留言話，BB變得好快，希望BB變變下可以變到媽媽咁靚！

之前祖藍喺囡囡未出世時，就發佈過BB嘅超聲波相，係肚入面已經見到BB遺傳到祖藍嘅最強基因，個鼻同爸爸一樣咁大，大家都不斷盼望BB要似媽媽，宜家BB出世，就發現始終敵唔過基因，不過似爸爸精精靈靈都係一件好事呀！

李亞男同王祖藍結婚3年，結婚生活一直羨煞旁人，囡囡未出世嘅時候，就同老婆李亞男一齊影咗一輯大肚相，仲用自己嘅大肚腩同老婆嘅大肚比較，不改鬼馬性格，宜家見佢哋一家三口咁快樂，真係連旁人都覺幸福呀！

Text：Mami Editorial

Photos：李亞男@IG