當媽後係街上會遇到嘅3件尷尬事

人生少不免充滿喜怒哀樂、尷尬、激動等，但有種尷尬，好離奇地通常發生喺自己成為左媽媽之後。非正式統計下，以下三件事最常發生。

1.畀人以為仲係大緊肚

產後一段時間，可能未修身得好成功，肚皮仲係有少少鬆弛。搭車個時成日都有好心人誤以為自己有咗，然後讓座。好心讓座嘅人雀躍咁起身讓位，自己又唔好意思拒絕話自己無大肚，就只可以尷尬咁坐低「承認」自己有咗。除左讓座，去到買BB嘢嘅地方，嗰度明明有嬰兒、幼兒嘅用品買，當你無帶住BB，推銷員就會好主動咁帶去初生嬰兒用品部，然後問：「幾多個月啊？」。

2.叫姨姨、嬸嬸

當推住BB，人人都知道自己已成為媽媽。做左媽媽之後，係街上會特別留意其他BB、小朋友同媽媽，大家有眼神交流之後都會互相點下頭、傾兩句。之後到分別嘅時候，對方就會叫小朋友講：「拜拜姨姨／嬸嬸」，如果係年紀較細嘅叫姨姨都無太大反應，但如果係年紀已經係十多歲，一聽到叫姨姨、嬸嬸，雖然知道無可能再係「姐姐」，但頓時都會覺得「我有咩可能係姨姨！」。但基於禮貌，只可以笑住回應或者微笑點頭。

3.被其他小朋友認錯係佢地媽媽

雖然年紀上無特別改變，身型可能只有肥瘦嘅轉變，但一做左媽媽之後，先會有被人認錯做媽媽嘅經歷。有時係街上、行緊超級市場，都會有小朋友叫自己做媽媽，甚至摸住自己隻腳叫媽媽，唔知道小朋友係咪特別分辨得到邊個已經係媽媽呢，但好奇怪地佢地又會認錯自己嘅媽媽⋯⋯

Text：Mami Editorial