一開口就忍唔住要講下BB 做咗媽媽後不自覺養成嘅5個習慣

成為媽媽後，最大嘅改變莫過於係生活上嘅一切作息時間、習慣、行為都通通同做女嗰陣唔同晒，以下呢5項又係咪大家嘅寫照呢？

1. 一開口就係講BB嘅嘢

BB每日發生過咩事、做過啲咩行為，媽媽都會一一記喺腦內，然後鉅細無遺咁同身邊人分享完一次又一次，完全唔會覺得厭，全因媽媽無時無刻個腦都淨係諗住BB，而且急不及待想話畀人知，究竟自己個BB有幾可愛！

2. 非常注重清潔

BB抵抗力差，少少病菌都有機會引起嚴重併發症，所以媽媽都會非常注重家人同BB嘅衛生情況，掂BB同BB嘅用品前都一定要洗乾淨對手，亦會好怕帶BB出街嗰陣，會遇到有途人觸摸BB嘅手同臉。

3. 照顧BB係優先

就算幾肚餓、想去廁所都好，一聽到BB喊，媽媽都會先安撫BB，然後再到自己解決，好多媽媽一心只諗住自己可以捱餓但BB唔可以，所以點都要照顧好BB先。

4. 留意多咗同小朋友有關嘅報道

一見到同BB相關嘅報道，媽媽都會好有興趣睇下，仲會分享埋畀另一半睇，見到感動嘅文章會一齊感恩，見到悲傷嘅報道會一齊婉惜，而且互相警惕唔好犯上育兒錯誤，令BB有機會受傷。

5. 望多咗街上嘅BB

以前唔算得上特別鍾意BB，所以出街見到BB都唔會特別有感覺，但自從做咗媽媽之後，對街上嘅BB都會顯得有母性，會不期然望著啲BB笑，如果自己都帶著BB出街，會希望BB都同其他BB互動下。

Text: Mami Editorial