好想一個人靜下 做咗媽媽後 呢5件事都變成係奢望

BB出世之後，每日都忙到幾乎連飲杯水嘅時間都冇，有好多以前常常做或好想做嘅平常事，喺成為媽媽後都變成奢侈嘅事。

1. 好想一個人靜下

每個人都會有想自己獨處，一個人發下呆、思考下人生嘅時候，媽媽都唔例外。但有咗BB之後，BB就成為媽媽密不可分嘅一部分，無論媽媽去邊都必然要帶住BB，有唔少媽媽都苦笑就連去廁所都要帶埋BB入去，完全冇機會畀自己獨處。

2. 好想瞓到自然醒

初生BB不分晝夜喊醒同餵奶，媽媽早就已經忘記咗一覺瞓到自然醒嘅精神飽滿感覺，真係好想重溫一下！唔知仲要捱幾多個晚上呢？

3. 好想同姊妹們約會

全職媽媽嘅人生就好似得返BB同老公，每日都忙著湊仔、做家務同服侍老公；在職媽媽就最多仲有一班同事，但放工後都要趕住返屋企湊BB同做家務。媽媽們有時都會好掛住自己嘅一班姊妹老友，想約出嚟吹水飲嘢，但現實中都要以BB為優先，同好友嘅約會唯有一拖再拖。

4. 好想安靜食一餐飯

無論喺屋企定係外出用餐，BB好多時都唔會乖乖哋等爸爸媽媽食完飯同佢哋玩，會扭抱再郁嚟郁去。其實媽媽只係想好地地、慢慢咁食完一餐飯，而唔係要同老公鬥快食完輪流抱BB。有時咁啱喺食嘢嘅時候BB瞓著覺，媽媽簡直覺得喺天賜嘅禮物。

5. 好想去一趟寫意嘅旅行

好羨慕周圍嘅朋友想飛就飛，想去邊就去邊，但帶住BB去旅行始終有好多唔方便，而且預料到去旅行都要無時無刻照顧BB嘅需要，而唔能夠盡興去Shopping、玩好夜先返酒店，唯有等BB大個啲先諗。

Text: Mami Editorial