「第時一定唔會似阿媽咁！」 不自覺步媽媽後塵嘅5件事

做女嘅時候，總覺得媽媽係一種好麻煩嘅生物，咩都要干涉、日哦夜哦、郁啲就情緒大爆發⋯⋯暗暗同自己講，第時一定唔可以好似自己媽媽咁，反而要成為優雅又時尚、同仔女做好朋友嘅媽媽。然而，當自己成為媽媽後，先發覺自己亦開始有當時自己媽媽嘅影子，先醒覺到原來媽媽嘅呢啲性格特質，都係被自身家庭日復日塑造而成。

1. 嘮嘮叨叨

「起身！摺被！」、「去邊？幾點返屋企？」⋯⋯生活上嘅大小事都會受到媽媽嘅干涉，連自身嘅自由都要管埋一份，做女嘅時候總覺得媽媽管太多。但當自己做媽媽之後，就會發現小孩總係三催四請先叫得郁做某件事，唔叫就直情唔理自己，唔問就一定唔會主動同自己講，令媽媽習慣性每樣嘢總會重複提醒小朋友去做，再寡言嘅媽媽都會慢慢變得長氣。

2. 冇耐性

媽媽好多時都會覺得一日24小時都唔夠用，時間都係分秒必爭，當遇到小朋友總係慢吞吞食嘢、出門返學前總係有好多搞作而遲遲出唔到門，但媽媽又要趕住做下一件事，耐性就會好易被磨滅晒，所以好多時都會好急咁叫小朋友「食快啲！」、「啲嘢凍晒喇！」、「返學遲到喇！」令小朋友覺得媽媽係咁催自己而唔開心，但又唔明媽媽咁急做咩。

3. 脾氣差

每日都有大量工作要做，無時無刻都令媽媽充滿壓力，當小孩各種事情都不如媽媽理想嘅進行，就好易令媽媽情緒爆發，而向家人發脾氣。

4. 唔打扮自己

連去個廁所、好好食個飯嘅時間都冇，時間都通通用喺照顧屋企人，為小孩配襯衫褲上，反而媽媽就唔會點裝扮自己，多數都係著簡單方便嘅衣著，懶得去搭襯，著嚟著去都係嗰幾件衫，慳返用喺自己身上嘅時間，有時會令小朋友覺得，媽媽好懶於打扮自己。

5. 厚面皮

買嘢會講價、買返嚟嘅嘢有少少損壞就要拎去退換、有著數優惠就會衝去同一班師奶搶⋯⋯好多事喺做女嘅時候都會覺得有啲丟臉而唔會去做，不過當做咗人媽媽後，會覺得好多嘢都應慳得慳，小朋友嘅嘢唔可以將就，所以就算覺得有少少丟臉都會去做。

Text：Mami Editorial