湊BB方面 老公表現體貼嘅5個舉動

好多時候媽媽都會嫌棄老公係湊BB方面無貢獻，有時仲會幫倒忙，所以先會係媽媽界被統稱為豬隊友！

雖然大家都係同時間迎接新生命，但唔知點解自己都已經上哂手，老公都仲係一舊飯咁。唔知係咪有太大對比關係，當老公係自己湊BB個時主動做以下5件事，媽媽就已經覺得好體貼、好滿足。

1.幫手掃風

BB大個左容易對周圍嘅事分心、玩起上黎可以飲奶飲超過半個鐘，媽媽要低住頭、彎住身半個鐘咁餵，中途BB仲會扭扭擰擰，要順利餵奶都係一件難事。如果老公肯主動幫BB掃風，等媽媽可以稍微抖一抖，餵人奶嘅媽媽又可以有時間著返好啲衫，咁就好喇。

2.出街揹BB

如果要去嘅地方唔方便推BB車，要出動到揹帶的話，BB又有返咁上下重量，時間長啲媽媽就會揹得好吃力。但如果老公肯幫手揹BB，媽媽去街都會輕鬆啲，BB又可以同爸爸增進下感情！

3.比時間媽媽解決生理需要

好多時湊住BB係忙到去廁所、沖涼嘅時間都無。就算有得去廁所，BB都會係外面嫌悶、嘈到拆天搵人陪。如果老公可以係媽媽有生理需要嘅時間伸出援手，幫手同BB玩一陣、唔催促媽媽，比時間媽媽解決。媽媽健康、衛生狀況好，先有體力、精神照顧BB架嘛！

4.幫手做家務

湊過BB嘅都知湊得BB就無時間做家務，但淨係BB嘅嘢，都要洗奶瓶、洗衫、抹玩具，仲要加埋屋企基本清潔、家務等等，一個人兩隻手係做極都做唔完架。如果可以加埋爸爸兩隻手，事情就會事半功倍，咁大家先有更加多時間陪到BB架嘛。

5.主動幫BB同媽媽影相

BB大得咁快，媽媽緊係想影低BB同自己嘅時光。但講就咁講，湊住BB又點會得閒影相，影得最多咪BB嘅單人照，再唔係頂多係媽媽同BB嘅大頭自拍，想影套衫又影唔到BB個頭。但爸爸嘅角度就可以影到哂媽媽同BB，如果下下都要媽媽叫先影，影出黎又會唔夠自然、有啲刻意。

Text : Mami Editorial