【奶奶支持自己餵母乳母乳咁神奇原來同佢有關】

By 港媽的第二生活 on 10 Dec 2018

2018年新手媽媽，典型人馬座，最怕無左自己無左自由。但我深信，湊仔同活出自己無衝突，唯有愛自己先識點樣愛別人，包括自己嘅子女。決定開個Blog分享自己努力尋找work-life balance的過程。

藍藍九個月大，好好彩無乜病過。佢嘅天真無邪嫲嫲經常大讚係媽媽餵母乳嘅功勞。如果有睇過之前關於奶奶嘅文章，應該記得佢喺我一路坐月，一路接收好多新嘅育兒資訊，其中佢聽埋聽埋最多關於餵母乳嘅知識，令佢覺得母乳好神奇、好勁，好支持媽媽繼續餵。如是者，BB越食越壯健！

「其實點解母乳真係咁勁嘅呢？飲母乳嘅BB免疫力好似真係好啲……」奶奶經常掛在口邊。佢嘅求知精神，我真係好欽敬，自己都只係一直以來知道母乳對BB免疫力好，但無深究，於是幫佢上網search。原來係同母乳內含有嘅乳鐵蛋白(Lactoferrin)有關！

乳鐵蛋白係免疫系統重要嘅組成成分，對BB成長好重要！

（1）乳鐵蛋白可以促進腸道發展，令BB吸收得好啲！肥肥白白健健康康，就係咁黎。

（2）腸道乳鐵蛋白數量愈豐富，腸道壁膜就愈豐厚，可形成強效抗菌、抗炎的屏障！話哂腸道係人體最大免疫器官，可想而知腸道好、免疫力自然好！

（3）乳鐵蛋白可以同「鐵」結合，令其順利被BB腸胃吸收，能有效預防鐵質缺乏症、貧血、缺鐵性疲乏

母乳有豐富嘅乳鐵蛋白，無可爭辯！一search之下，仲要發現原來初乳含有最豐富嘅乳鐵蛋白，每一公升有7克，向BB提供出世後頭幾個星期最為關鍵嘅免疫保護。所以，切記，幾辛苦都好，生完要埋身！埋身！埋身！經過初乳後，成熟乳汁嘅乳鐵蛋白降低至平均每公升0.44至4.4克，而成熟牛奶嘅乳鐵蛋白就很低，平均每公升只有0.03至0.1！去到呢度，突然好想用數據撻落嗰啲話母乳無營養嘅三姑六婆嘅面度。