媽媽見到BB感到最欣慰嘅4件事

無女人天生識做媽媽，每個媽媽都係邊做邊學點湊BB。

雖然湊BB嘅過程唔簡單又多辛酸，但當見到以下4件事，就會覺得一切都值得。

1.BB重左

每個媽媽都想養到BB好似豬仔咁肥肥白白，每次去健康院幫BB上磅磅重、度高，都好期待BB比上一次重左、高左。

以前只會在意自己上磅會唔會重左，而家反而係日盼夜盼BB上磅個數字會升、姑娘畫嘅個條生長線畫係水平以上。

雖然數字唔代表啲咩，但起碼叫有實質數據證明媽媽照顧得好，有鼓勵先有進步架嘛。

2.BB食得哂

做媽媽緊係想BB係小吃貨，中意食嘢得黎又唔會揀飲擇食。儘管只係小至一支奶，大至一個食物盒，都係媽媽為BB精心準備。

尤其係初初加固個時，媽媽終於可以一展身手，如果BB可以大啖大啖咁食，或者好樂意咁食哂，食完再表露一個滿足嘅樣，真係令人開心到要寫日記記底當日。

3.BB熟睡

好多時幫BB影嘅相，盡大部份都係BB訓緊覺。因為訓緊覺嘅BB個樣真係好乖、令人好著迷，加上訓左先可以定定地影到相。

媽媽忙完一大輪、氹足一大輪，終於見到BB熟睡嘅樣。

望住佢地眼皮、嘴仔、手仔郁黎郁去，訓到流口水，訓訓下又會笑，雖然唔知佢地夢到啲咩，但相信都會係重現緊同自己嘅畫面。

4.BB笑出聲

BB果然係最天真、單純，因為我地永遠掌握唔到佢地嘅笑點。

點解一個玩具、一個發音就可以令到佢地笑到咔咔聲，仲要重重複複咁因爲呢樣嘢而笑。

雖然係諗極都諗唔明，但係佢地不停咁笑嘅時候，自己都會不期然咁笑埋一份。

Text: Mami Editorial