玩具唔係亂咁買？爸爸媽媽要識揀

應該點幫BB揀玩具？

有人話買玩具比BB等於寵BB。雖然玩具叫玩具，但唔係得個玩字，BB揀岩玩具黎玩係有助BB發展架！

只要根據BB唔同時期嘅發展方向去買玩具，就大大提升左玩具嘅用途、又唔會亂浪費錢喇。

初生-2個月

由於岩岩出世嘅BB視神經處於混亂狀態，睇嘢仲係模模糊糊，而且只係睇到黑白色。

呢個時候爸爸媽媽可以買黑白卡，印有黑白對比強烈嘅圖案，係BB面前慢慢左右咁郁吸引BB追視，有助BB視覺感官發展。

3-5個月

BB頸部開始有力，而且視覺開始清晰同睇到少量色彩。

BB會有興趣伸手觸摸身邊嘅嘢，但因為未掌握到距離感，所以會捉極都捉唔到。

爸爸媽媽可以買一個BB健身架，吸引BB伸手捉健身架上面嘅軟布玩具。

記得啲玩具要調較係BB掂到嘅距離，有助BB觸覺、視覺兩方面嘅感官發展。

6-8個月

呢個時候BB眼睛睇嘅顏色同範圍愈黎愈多同廣，而且手仔亦可以左右手交替咁捉住玩具。

就可以買有聲光、機關嘅玩具，最好上面有按鈕或者滾輪，就可以訓練BB用手指做按壓、撥動嘅細動作。

唔單止發展到視覺同觸覺，仲有助BB了解周圍環境。

9-12個月

BB慢慢已經學識點樣靈活咁運用佢地嘅小手，拎嘢捉嘢唔會再用成隻手仔，而係可以只用某幾隻手指。

所以爸爸媽媽要買有開口嘅玩具比BB，例如有蓋、有門，等BB學習點樣拉開同推入嘅小動作。有助BB發展腦部邏輯思考力。

Text: Mami Editorial