【如果時光可以倒流，你⋯⋯仲會選擇做媽咪嗎？】

《如果無生到BB你呢家會做緊咩？如果時光可以倒流你仲會選擇做媽咪嗎？》

有時我係到諗如果我無生過僑蛋我會係到做緊咩？

番緊工？打緊機？食緊飯？行緊街？飲緊酒？

係未有僑蛋之前，我係寫字樓番工，我最大既嗜好係：打機，食野，行街。

一到假期就同朋友行下街，食下飯，其實日子都過得幾逍遙。

直到僑蛋既出現....

僑蛋係我同老公期盼左好耐既結晶品，我一直好想要個小朋友，聽人講湊小朋友好辛苦，換片，喂奶，氹訓教...所有野我都有心理準備，但天真既我忘記左仲有其他因素。

生左僑蛋之後曾經既嗜好通通同我無緣！

打機？邊會有時間呀？訓左先打？大聲少少都怕嘈醒佢啦！打到一半喊，掟唔掟低隊友去湊B好？

食飯？樓下快餐店就有你份？想食好野？高級少少既你帶B入去又怕佢搗亂，想食好野要排隊BB肯乖乖地陪你等嗎？入到去無BB櫈又係食唔到！你以為降低要求去快餐店就得？你只可以叫BB食到既野，叫一個餐分完比BB你就食唔飽，叫多一份你又食唔哂，想同朋友食飯更加係友情挑戰賽，你問下個朋友介唔介意食到一半可能會比對面個小魔怪拎野食掟佢，食到周圍係，尖叫個陣陪你接受旁人奇怪既目光。

行街？用孭帶個女會手多周圍掂，孭得多會累，佢如果不斷尖叫喊既你只會想極速番屋企。

原來有左小朋友最辛苦既並唔係湊仔，而係失去哂所有你曾經最大既嗜好，好似將你由一個人磨呀磨呀磨，磨到變成一個只有湊B既媽咪。身邊既朋友越黎越疏遠，電話永遠靜音，每日最開心既時間係BB訓左既深夜...

有時望住番工收工既路人，真係好羨慕，有人話全職媽媽工作量唔比番工既爸爸少，我就覺得工作量多唔多唔係最大問題，最大問題...係我個心真係好累好累。

如果時間可以再重來我會唔會選擇再生BB?答案係絕對會。雖然我現時好似失去左全部野只係剩番個家庭。但係我知道呢個家庭會係我一生最重要既野！即刻無哂全部嗜好都好值得我去付出！每次見到僑蛋笑，無左幾年時間又算得係咩播（笑）

各位媽咪共勉之！我地真正完全陪到佢地既時間得3年咖咋，3年後佢地就開始番學...再慢慢地就會有自己既生活...然後結婚生仔....到最後我地回望過去，呢3年就會係我地最美好既回憶。

====================================

Text  : 僑蛋媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！